Расійскі эканаміст Аляксандр Пачынок, які займаў у мінулым пасады міністра па падатках і зборах, міністра працы і сацыяльнага развіцця, а таксама намесніка міністра фінансаў, памёр ва ўзросце 56 гадоў.
ria.ru
«Пайшоў з жыцця Саша Пачынок. Спынілася сэрца. Бывай, сябра. RIP», — паведаміў у сваім Twitter галоўны рэдактар радыёстанцыі «Эхо Москвы» Аляксей Венядзіктаў.
На «Эхе» Пачынок з верасня 2012 года вёў перадачу «Фіскал» аб падаткаабкладанні розных краін і эпох.
Былы прэм'ер-міністр Міхаіл Касьянаў, ва ўрадзе якога Аляксандр Пачынок быў міністрам працы і сацыяльнай абароны, заявіў, што Пачынок унёс вялікі ўклад у станаўленне расійскай эканомікі і сацыяльнай сферы.
Па словах Касьянава, Пачынок шмат працаваў над станаўленнем падатковай сістэмы Расіі і быў адным з распрацоўшчыкаў пенсійнай рэформы.
11 сакавіка ў эфіры тэлеканала «Дождь» Аляксандр Пачынок распавядаў пра тое, у якую суму Расіі можа абыйсціся далучэнне Крыма.
«Я заўсёды кажу пра тое, што на любое рашэнне трэба ісці з расплюшчанымі вачыма. Так, цікавае, добрае рашэнне, вярнулі Крым — выдатна, толькі, хлопцы, давайце думаць, ад чаго прыйдзецца адмаўляцца, бо гэта каласальныя грошы, гэта не мільярды, гэта не дзясяткі мільярдаў, гэта не сотні мільярдаў, гэта трыльёны рублёў», — сказаў эканаміст.
Аляксандр Пачынок уваходзіў у склад федэральнага палітычнага камітэта партыі «Грамадзянская платформа». Заснавальнік партыі Міхаіл Прохараў выказаў спачуванні яго родным. Раней Пачынок быў членам партый «Дэмакратычны выбар Расіі» і «Саюз правых сіл».
Са студзеня па ліпень 2012 г. Аляксандр Пачынок быў членам Савета Федэрацыі ад Пермскага краю, да гэтага на працягу чатырох гадоў прадстаўляў у СФ Краснадарскі край.
