А 8.00 20 снежня кандыдат у прэзідэнты ад Аб’яднанай грамадзянскай партыі Яраслаў Раманчук распаўсюдзіў заяву наступнага зместу:
«19 снежня 2010 года адбылася дэманстрацыя на Кастрычніцкай плошчы Менска. Дадзенае мерапрыемства планавалася выключна як мірны, як выраз думкі грамадзян.
На жаль, падчас мітынгу на Кастрычніцкай плошчы М.Статкевіч, А.Саннікаў і В.Рымашэўскі заклікалі і павялі людзей на плошчу Незалежнасці. Там імі былі справакаваныя беспарадкі і ажыццёўлена спроба захопу будынка Дома ўрада.Пад пагрозай апынуліся жыцці тысяч чалавек.
Я, кандыдат у прэзідэнты Яраслаў Раманчук, асуджаю заклікі да дзеянняў, якія парушаюць мірны характар правядзення масавых акцый. Падзеі ночы 19 снежня паставілі пад пагрозу жыццё людзей.
А.Саннікаву, падаграванаму ягонай жонкай І.Халіп, вельмі хацелася сарваць далікатны дыялог, які зараджаўся паміж Беларуссю і міжнароднай супольнасцю.
Я разам з Анатолем Лябедзькам, старшынём Аб’яднанай грамадзянскай партыі, неаднаразова спрабавалі пераканаць А.Саннікава і М.Статкевіча адмовіцца ад планаў радыкальных дзеянняў, бо я ўпэўнены, што рэвалюцыі ў Беларусі руйнуюць дэмакратыю. Масавыя акцыі з ужываннем сілы не здольныя стварыць атмасферы для паўнавартага грамадскага дыялогу».
«Наша Ніва» звярнулася ўштаб-кватэру Аб’яднанай грамадзянскай партыі, каб перапэўніцца, што заява. «Так, заява праўдзівая», — адказалі нам.
Тым часам сем іншых кандыдатаў у прэзідэнты — Някляеў, Саннікаў, Рымашэўскі, Статкевіч, Кастусёў, Ус, Міхалевіч — былі затрыманы і знаходзяцца ў невядомым месцы. Даставерна вядома пра жорсткае збіццё чатырох з іх — Някляева, Саннікава, Рымашэўскага, Кастусёва.
* * *
Сёння ранкам Яраслаў Раманчук выступіў з заявай, у якой асудзіў дзеянні Андрэя Саннікава, Віталя Рымашэўскага і Міколы Статкевіча. Заяву маланкава распаўсюдзілі дзяржаўныя СМІ. «Наша Ніва» звярнулася да былога кандыдата па каментар.
«Я кажу пра тое, што Някляеў, Саннікаў, Статкевіч павінны адказаць за свае дзеянні. Акцыя павінна была быць праведзена згодна з ранейшымі дамоўленасцямі. Мы павінны былі сабрацца на Кастрычніцкай плошчы і там мірна чакаць вынікаў выбараў. Аднак без кансультацый з маім штабам, са мной, было вырашана ісці да Дому урада», — распавёў карэспандэнту «НН» Яраслаў Раманчук.
Палітык таксама дадаў, што лічыць дзеянні апазіцыі на плошчы Незалежнасці правакацыйнымі: «Ну, пайшлі па праспекце. Ну, залезлі на Леніна… І што далей? Я таксама быў там. Бачыў, што плана дзеянняў не было. Гэтыя эмацыйныя рэчы і склалі падмурак для беспарадкаў».
Яраслаў Раманчук таксама распавёў, што яму паведамілі аб планах уладаў «разабрацца з палітычнымі партыямі», прадстаўнікі якіх вечарам 19 снежня удзельнічалі ў арганізацыі акцыі пратэсту. «Мне распавялі, што ўлады збіраюцца зачыніць палітычныя партыі. Каб выратаваць сітуацыю, я і зрабіў адпаведную заяву. Я лічу, што зараз трэба вызваліць затрыманых людзей і правесці расследаванне, ва ўсім разабрацца», — распавёў «НН» Яраслаў Раманчук.
