1 студзеня 2015 г. спыняецца выпуск у абарачэнне банкнотаў Нацыянальнага банка Рэспублікі Беларусь наміналам 50 рублёў узору 2000 года, а таксама банкнотаў названага наміналу мадыфікацыі 2010 года.

Такое рашэнне прынята пастановай Праўлення Нацыянальнага банка Рэспублікі Беларусь ад 5 верасня 2014 г. № 560 зыходзячы з немэтазгоднасці далейшага выкарыстання названых банкнотаў у наяўным грашовым звароце і з мэтай скарачэння дзяржаўных выдаткаў на іх выраб, паведамляе прэс-служба Нацбанка.

Да 1 ліпеня 2015 г. банкноты Нацыянальнага банка наміналам 50 рублёў падлягаюць прыёму пры ўсіх відах плацяжоў усімі суб’ектамі гаспадарання, у тым ліку і банкамі Рэспублікі Беларусь.

З 1 ліпеня 2015 г. банкі і суб’екты гаспадарання спыняць выдачу названых банкнотаў фізічным асобам, у тым ліку ў якасці рэшты. Пры гэтым прыём банкнотаў наміналам 50 рублёў банкамі ад суб’ектаў гаспадарання будзе ажыццяўляцца да 1 верасня 2015 г.

Абмен банкнотаў наміналам 50 рублёў можна будзе зрабіць без абмежаванняў і без спагнання камісійнага ўзнагароджвання ў любой суме, кратнай 100 рублям:

— з 1 ліпеня 2015 г. па 31 снежня 2015 г. уключна – у Нацыянальным банку Рэспублікі Беларусь і банках краіны;

— з 1 студзеня 2016 г. па 30 чэрвеня 2016 г. уключна – у Нацыянальным банку Рэспублікі Беларусь.

З 1 ліпеня 2016 г. банкноты наміналам 50 рублёў будуць выключаны з абарачэння і будуць лічыцца несапраўднымі.

Клас
0
Панылы сорам
0
Ха-ха
0
Ого
0
Сумна
0
Абуральна
0