Былая ўкраінская дэпутатка Таццяна Чарнавол ваюе як аператарка комплексу «Стугна». Фота:24tv.ua
Супрацьтанкавыя ракетныя комплексы «Стугна-П» пачалі актыўна паступаць на ўзбраенне ўкраінскай арміі ў 2019-м. Тагачасны міністр абароны Украіны Сцяпан Палтарак адзначаў, што пастаўкі іх у раён Данбаса істотна змянілі расклад сілаў і вымусілі расійскія сілы практычна цалкам адмовіцца ад выкарыстання танкаў у зоне баявых дзеянняў.
У цяперашняй вайне, калі вораг мае колькасную перавагу, украінцы вынайшлі эфектыўную тактыку. Мабільныя групы вайскоўцаў з засады на шляхах перамяшчэння варожай тэхнікі знішчаюць бранемашыны, бензавозы і нават верталёты расійскай арміі з дапамогай супрацьтанкавых ракет «Стугна-П». Канструкцыя комплексу дазваляе аператару дыстанцыйна кіраваць ім, знаходзячыся за дзясяткі метраў ад пускавой устаноўкі, што мінімізуе рызыкі для разліку нават у выпадку, калі вораг выявіць супрацьракетны комплекс і адкрые па ім агонь.
На пачатку красавіка з’явілася відэа знішчэння расійскага ўдарнага верталёта Ка-52, які завіс над зямлёю на некалькі секундаў. Гэтага часу хапіла ўкраінскім дэсантнікам, каб зрабіць трапны стрэл. Пасля пуску ракеты бачна, што аператар не трымае верталёта ў прыцэле. Гэта зроблена для таго, каб сістэмы абароны верталёта не папярэдзілі пілота пра атаку, і толькі ў апошні момант накіроўвае ракету ў цэль.
Ракетны комплекс «Стугна-П» распрацаваны ўкраінскім канструктарскім бюро «Луч». Гэтае ж прадпрыемства распрацоўвала і супрацькарабельныя ракеты «Нептун», якімі быў патоплены флагман Чарнаморскага флота Расіі крэйсер «Масква». У часы СССР гэтае прадпрыемства распрацоўвала аўтаматыку для тарпед, ракет і кіраваных бомб.
Комплекс складаецца з трыногі з замацаванай сістэмай навядзення, ракеты ў пускавым кантэйнеры і пульта дыстанцыйнага кіравання, з дапамогай якога аператар, які можа знаходзіцца за 50 метраў ад устаноўкі, накіроўвае ракету да цэлі. Ракеты калібру 130 мм могуць мець розныя баявыя часткі — тандэмна кумулятыўныя, прызначаныя для знішчэння браніраванай тэхнікі і здольныя прабіваць да 800 мм брані за дынамічнай абаронай (дынамічная абарона — гэта кубікі, якімі абвешаныя сучасныя танкі, у іх утрымліваецца выбухоўка, якая дэтануе насустрач снараду), а таксама аскепкава-фугасныя і тэрмабарычныя для знішчэння жывой сілы.
Paкета можа ляцець з хуткасцю 200 м/с і знішчаць цэлі на адлегласці ад 100 метраў да 5000 метраў удзень і 3000 метраў уначы.
Cістэма навядзення напаўаўтаматычная, ракета кіруецца з дапамогай лазернага прамяня. Аператар бачыць цэль на маніторы — дадзеныя перадаюцца з сістэмы навядзення, націскае кнопку запуску і, калі цэль рухаецца, працягвае трымаць яе ў прыцэле.
Трэба адзначыць, што адзін стрэл «Стугны-П» нашмат таннейшы за Javelin: кошт адной украінскай ракеты складае каля 23 000 даляраў, амерыканскай — 78 000.
На відэа ў інтэрнэце часта бачныя надпісы па-арабску на дысплэі дыстанцыйнай сістэмы кіравання — гэта экспартны варыянт супрацьтанкавага комплексу, прызначаны для краін Блізкага Усходу, вядомы на рынку як «Скіф». Дадзеная мадыфікацыя паўстала ў выніку калабарацыі з беларускім прадпрыемствам «Пеленг».
Цікава, што да вайны Кіеў, дзе вырабляюцца ракеты, і Мінск, дзе вырабляюцца прыцэлы, дастаткова шчыльна супрацоўнічалі ў ваеннай сферы. У выніку гэтай супрацы з’явіўся не толькі «Скіф», але і супрацьтанкавы ракетны комплекс «Шэршань». Абодва гэтыя комплексы могуць страляць больш магутнымі ракетамі калібру 152 мм.
Ва ўмовах вайны экспартныя «Скіфы» таксама адправіліся на фронт, дзе знішчаюць тэхніку агрэсара.
Як Украіна робіць стаўку на беспілотнікі ў абароне ад Расіі
Усе чакаюць вырашальнай бітвы за Данбас. Ад чаго залежыць, хто ў ёй пераможа?
«Тэхніка не едзе, забеспячэння талковага няма». Якія хібы паказала расійская армія ва Украіне
