Праваенны мітынг у Маскве. Фота: АР
«Мы ўважліва вывучаем факты. Мы ўважліва вывучаем закон. Калі гэтыя меры будуць даступныя нам па законе, то мы іх выкарыстаем, як гэта будзе эфектыўна і мэтазгодна», — удакладніў Прайс.
Дзярждэп ЗША разглядае ўсе магчымыя варыянты і інструменты для прыцягнення Расіі да адказнасці за вайну ва Украіне, уключаючы прызнанне яе краінай-спонсарам тэрарызму, растлумачыў CNN іншы высокапастаўлены чыноўнік. Паводле яго, гэты працэс можа заняць некалькі тыдняў.
Па даных CNN, аб унясенні Расіі ў спіс краін — спонсараў тэрарызму прэзідэнта ЗША Джо Байдэна папрасіў украінскі лідар Уладзімір Зяленскі падчас нядаўніх тэлефонных перамоваў.
Размовы пра тое, каб уключыць Расію ў гэты спіс, вяліся ў ЗША і раней. У прыватнасці, у 2018 годзе на фоне «справы Скрыпалёў».
Дзяржавы-спонсары тэрарызму
У спіс краін-спонсараў тэрарызму трапляюць краіны, якія, на думку Дзярждэпа ЗША, «неаднаразова аказвалі падтрымку актам міжнароднага тэрарызму». Цяпер у гэты пералік уключаныя толькі чатыры дзяржавы ‒ КНДР, Іран, Сірыя і Куба.
Знаходжанне краіны ў спісе дае прэзідэнту ЗША магчымасці ўвесці дадатковыя санкцыі супраць яе або абмежаваць продаж зброі. Акрамя таго, статус краіны — спонсара тэрарызму дазваляе ЗША адмовіць такой дзяржаве ў эканамічнай дапамозе або зняць з яе прадстаўнікоў дыпламатычны імунітэт.
