Фота: pixabay.com
Раней СААЗ абвяшчаў пра 5,4 мільёна смерцяў ад кавіду за гэты час, але цяпер эксперты называюць лічбу, большую на 9,4 мільёна — прыкладна 14,9 мільёнаў смерцяў у выніку як прамых, так і ўскосных наступстваў пандэміі. Пры гэтым 14,9 мільёнаў — толькі прыкладная лічба, дакладную падлічыць немагчыма.
У гэтую лічбу ўваходзяць смерці ад кавіду, пра якія вядома СААЗ, меркаваныя смерці ад гэтай жа хваробы, пра якія не паведамлялася, і смерці, што мелі месца праз уплыў пандэміі на сістэму аховы здароўя.
Аналітыкі не ўлічвалі смерцяў, якіх удалося пазбегнуць праз змены ў сацыяльных паводзінах. Напрыклад, праз лакдаўны знізілася колькасць аварый на дарогах, што прывяло да меншай колькасці ахвяр ад гэтых аварый.
Прыкладна 70% смерцяў прыпадае на 10 краін. Гэта Бразілія, Егіпет, Індыя, Інданэзія, Мексіка, Перу, Расія, ПАР, Турцыя і ЗША. 57% заўчасна памерлых ад кавіду — мужчыны, 82% памерлых — людзі, старэйшыя за 60 гадоў.
Гендырэктар СААЗ Тэдрас Аданом Гебрэісус тлумачыць у адпаведным прэс-рэлізе, што новыя даныя пра смерці ад пандэміі — гэта не толькі новае сведчанне таго, наколькі сур'ёзнай яна была. Гэта яшчэ і доказ, што ўсім краінам неабходна інвеставаць у больш надзейныя сістэмы аховы здароўя, каб нават у выпадку крызісаў пацыенты маглі атрымоўваць медыцынскую дапамогу.
Чытайце таксама:
«Катастрофа». Эксперты пра скарачэнне насельніцтва Беларусі на 154 тысячы за два гады: «Гэта далёка не поўныя лічбы»
