Усе фота: mlyn.by

Сям'я часова жыве ў арэндным доме і будуе свой. Згарэлы дом Кагадоўскія вырашылі не аднаўляць, каб не траўмаваць дзіцячую псіхіку трывожнымі ўспамінамі. Тэма пажару ў сям'і пад забаронай.

Рома ад зносін з журналістамі стаміўся, падрабязна размаўляць не захацеў.

— Ганяю з сябрамі на ровары, — распавёў ён. — Стасуюся з аднакласнікамі. Адчуваю сябе нармальна. Так што ў мяне ўсё добра.

Паколькі дактары забаранілі яму наведваць школу з-за рызыкі падхапіць інфекцыю, навучанне было арганізаванае ў рэжыме анлайн. Рома паспяхова скончыў сем класаў і залічаны ў шэрагі курсантаў ліцэя МУС.

Лячэнне Ромы яшчэ не скончанае. Хлопчыку ўжо перасадзілі восем шматкоў скуры з цела маці. Як толькі Рома фізічна адужэе, перасадкі працягнуцца. Узнавіць іх плануюць прыкладна ў лістападзе.

Акрамя складанасцяў са здароўем Ромы, на сям'ю абрынуліся і побытавыя праблемы.

Арэндны дом у 200 квадратаў у зімовы перыяд «з'ядаў» салідную частку бюджэту сям'і. Толькі газу згарала па тысячы кубоў за месяц, да гэтай сумы дадаваліся і іншыя камунальныя выдаткі. Так што жыроўка «цягнула» на 300 з лішнім рублёў. Камфортна, але дорага.

— Я вымушаная была вярнуцца на працу, а дэкрэтны аформіла на мужа Аляксея, які ў той час не меў сталай занятасці, — распавядае Марыя, мама Ромы. — Дэкрэтных каля 700 рублёў, яшчэ 600 — мая зарплата. Увесь бюджэт прыкладна 1300. Калі адняць камунальныя, то на жыццё застаецца каля тысячы. На ежу хапае, на пакупках даводзіцца эканоміць. Але мы не скардзімся, вось з будоўляй бы разабрацца…

Участак для будаўніцтва новага дома сямейства атрымала ў Занарачы, побач з домам мамы Аляксея. Як толькі завяршылася папяровая валакіта па афармленні, пачалося будаўніцтва.

Мама з Ванем, якога выратаваў Рома

— Нам дзяржава вылучыла субсідыю ў памеры каля ста тысяч рублёў, — кажа Марыя. — Гэтыя грошы, а яшчэ страхавая выплата за згарэлы дом, пайшлі на будаўніцтва. За некалькі месяцаў майстры прыватнай арганізацыі, якую мы нанялі, вывелі падмурак, паставілі каробку, накрылі дах. У доме ўстаноўленыя вокны, залітыя чарнавыя падлогі, падшытыя столі. Цяпер будаўнікі ўцяпляюць фасад.

З праектам сям'і дапамаглі ў мясцовым УКБ, перадаўшы яго на бязвыплатнай аснове. Прычым, улічылі і пажаданні сям'і: ацяпленне зрабілі электрычным, а зыходную плошчу паменшылі. Але бюджэту, які быў у запасе, на завяршэнне будаўніцтва не хапае.

— Цяпер купляем кожны месяц невялікую колькасць матэрыялаў. Напрыклад, па тры-чатыры мяшкі цэменту, — кажа Аляксей. — Ёсць яшчэ адзін рэзерв — мацярынскі капітал, які можна выкарыстоўваць. Так што неяк будзем дабудоўвацца, каб хутчэй перасяліцца. Магчыма, зробім адзін пакой і з'едзем з арэнднага жылля. Сваё ёсць сваё.

Клас
Панылы сорам
Ха-ха
Ого
Сумна
Абуральна

Хочаш падзяліцца важнай інфармацыяй ананімна і канфідэнцыйна?

Каб пакінуць каментар, калі ласка, актывуйце JavaScript у наладах свайго браўзеру