«Ведаю, што многія фонды і фондзікі з Беларусі сышлі, а некаторых мы проста прыбралі, таму што вы ведаеце, чым яны займаліся — на замежныя грошы здзяйснялі перавароты, спрабавалі здзейсніць. Таму мы, калі вывучылі працу гэтых фондаў і іншае, вымушаныя былі ад іх адмовіцца.
Я не хаваю, што былому кіраўніку спраў даручыў стварыць пад імем, ну скажам так, пад дахам прэзідэнта адзіны нацыянальны фонд», — заявіў Лукашэнка.
На ягоную думку, фонд прыцягне людзей, якія шчыра хочуць дапамагчы.
«Натуральна, тыя шчырыя сумленныя людзі, якія хочуць у нас займацца дабрачыннасцю, яны з задавальненнем прыйдуць у гэты фонд, таму што будуць разумець, што ніводная капейка з яго налева ці направа не пойдзе, а будзе выкарыстаная на высакародныя мэты», — лічыць Лукашэнка.
За апошнія два гады ў Беларусі былі па палітычных меркаваннях знішчаныя амаль 300 арганізацый грамадзянскай супольнасці, многія з якіх займаліся акурат дабрачыннасцю.
