Беларусаў накрыла новая «падпрацоўка» ад махляроў. Выбрацца без вялікіх страт з яе амаль немагчыма

Пра што гаворка?

Калі эмоцыі сыходзяць, ахвяры разводзяць рукамі: як можна было ў гэта паверыць? Махлярства падаецца як новая тэхналогія ў e-commerce. Нібыта крамы і гандлёвыя платформы (накшталт ні многа ні мала Amazon) не спраўляюцца з патокам кліентаў — ім патрэбная дапамога ў рэгістрацыі і выкананні заказаў. За гэта вы атрымаеце працэнт. Пасля падлашчвання ў выглядзе невялікіх заробкаў сістэма прыводзіць ахвяру да павышэння ставак. Баючыся страціць ужо выдаткаванае, людзі згаджаюцца на ўсе вялікія выдаткі.

Bella, Amazon і Аляксандр

У тыкток інжынеру-электрыку Аляксандру прыйшло паведамленне ад Bella. Яна прадставілася, сказала, што з Сінгапура і што ёй 29 гадоў, і пацягнула ў тэлеграм. Там размова пайшла пра работу.

— У чым сутнасць працы? Выконваеш замовы пакупнікоў. Шторы, касметыка, дроны — што заўгодна. Замова на $10 — ты плаціш, потым крама вяртае табе гэтыя грошы з невялікай камісіяй, — тлумачыць Аляксандр.

Bella прадставіла платформу, якая нібыта працуе з Amazon. Усе здзелкі віртуальныя, гэта не хаваецца. Навошта? Для накруткі колькасці продажаў і рэйтынгу крамы, які дазволіць ёй зарабляць больш ужо з рэальнымі кліентамі.

Гэта поўная выдумка, але ў тэорыі для многіх людзей гучыць як магчымая праўда.

Пасля рэгістрацыі Bella/сістэма кідае трохі стэйблкоінаў (папаўненне акаўнта на платформе і вывад грошай ідуць праз крыптакашалёк) для старту, а далей сядзі і клікай, выконваючы абʼём працы. Трэба выканаць (клікнуць) 60 заказаў — гэта пакет. Пасля гэтага можна вывесці атрыманыя камісійныя.

— Заказ на $200 — камісія каля $3, — кажа Аляксандр.

Bella падказала, як вывесці першы заробак, які склаў каля 30 USDT. Усё спрацавала.

На наступны дзень трапілася замова на $680, а на балансе Аляксандра было $600. Прыйшлося закінуць $80. Але грошы вярнуліся ўжо з камісіяй $25. За другі дзень беларус паклаў на рахунак $200, а вярнуў $600. Чатыры сотні чыстага прыбытку ў крыпкашальку — прыемна.

Наступіў трэці дзень, і замовы падаражэлі. Аляксандр вярнуў сістэме заробленае ўчора і дадаў яшчэ. Калі прыйшла замова на $800, ён усё зразумеў і спыніўся.

Golden Ant, Лена і Каця

Сёстры пайшлі далей. Сістэма была іншая. Гэта сусветная навінка. Цяпер сайт даступны па новым адрасе, таму заходзім толькі паглядзець, рукамі нічога не чапайце. Акцэнт цяпер на іарданцаў, таму кантэнт часткі About us лакалізаваны.

Запрашэнне прыйшло ў інстаграм.

— Звычайны профіль, фоткі нібыта сапраўдныя. Не падумала прагартаць да дна — тады б убачыла, што акаўнт стаў запаўняцца з чэрвеня гэтага года, — уздыхае Лена. — Я наогул звычайна такія паведамленні нават не адкрываю, а тут лёгка: ну давайце, расказвайце.

І Roberta на крывой рускай, але з вялікай эмпатыяй перацягнула Лену ў тэлеграм, дзе распавяла пра новую платформу Golden Ant.

Нібыта ёсць былы топ з Amazon, які сабраў інвестыцыі і запусціў тэхналогію новага пакалення для электроннай камерцыі. Ніякіх падрабязнасцяў. У залежнасці ад фокусу ашуканцаў гэты экс-менеджар можа быць супрацоўнікам не Amazon, а кампаніі з той краіны, дзе шукаюць ахвяр, — напрыклад, «з вялікім вопытам працы ў Іарданіі».

— Я стала шукаць дрэнныя водгукі і нічога не знайшла. І добрых не было. Наогул нічога не знайшла.

Лена зразумела, што ёй трэба будзе атрымліваць працэнт за выкананне заказаў — фізічна гэта азначае клікаць мышкай.

— У чым сэнс працы? Я разумела так: крамы не паспяваюць апрацоўваць замовы — трэба дапамагчы прыняць і апрацаваць іх. Плюс гэта перавод грошай у крыптавалюту — думала, што на гэтым можна зарабляць.

Roberta цяпер звалі Lina. Яна сказала, як рэгістравацца і што будзе зарабляць на Лене. На гэтую праўду дзяўчына ўвагі не звярнула.

— Я пачынаю выконваць заказы на сваёй старонцы, потым мне даюць доступ да іншай — а там працэнт вышэйшы! Пасля навучання яна паказала мне, як вывесці заробленае, — ура, атрымалася.

З дапамогай памочніка/памочніцы Лена завяла крыптакашалёк, навучылася карыстацца біржай, выводзіць USDT, прадаваць і закідваць беларускія рублі сабе на карту.

Надышоў час самастойнай працы. Трэба было выканаць 40 заказаў. Выводзіць грошы Lina не раіла: чым больш сродкаў на балансе, тым вышэйшая камісія.

Лена ўзяла ў кампанію сястру Кацю, і дзяўчаты пачалі. Праз некалькі заказаў (з неабходных 40) усплыло нешта незвычайнае: «Сумесная задача». Сумешчаны заказ з трох частак — першая каштуе $200.

— Яна мне піша: «О, табе пашанцавала, у сумесных задачах працэнт высокі — выконвай абавязкова. Няма грошай? Ну як так… Папоўні, ты ж бачыла, што ўсё працуе, выводзіцца, усё надзейна! Псіхолагі!

Другая частка — $500. Забраць $200 ужо нельга, толькі наперад. Трэцяя частка — $2000.

— У мяне пачынаюць трэсціся рукі. Бягу, здымаю, кладу на рахунак. Засталося яшчэ 22 замовы. Праходзіць некалькі звычайных — зноў «трайны», ужо на тысячы.

Лена напісала ў тэхпадтрымку. Там супакоілі: маўляў, не хвалюйцеся, інакш вы не зможаце забраць свае грошы. Чаму мы не папярэдзілі? А вы не пыталіся.

— Мы пазычылі ў сяброў. У выніку дабраліся да 39 заказаў з 40. І 40-й — новая сумесная купля. У агульнай складанасці мы перавялі $14 тыс. Зрабілі апошнія замовы, націскаем на кнопку «Вывесці грошы» — адмоўлена.

Тэхпадтрымка патлумачыла гэта так: занадта доўга збіралі грошы для апошняй замовы, таму для размарозкі трэба заплаціць яшчэ $4600. Вось тут уся драма перапіскі.

Пасля гэтага вочы расплюшчыліся. І тут жа закрыліся ад слёз.

— Далей з намі стаў гаварыць робат. Мы прадалі машыну, каб не псаваць адносіны з сябрамі і аддаць даўгі. Было дзіка сорамна. Тры дні як у тумане.

Сёстры змірыліся са стратай: жывыя-здаровыя, ляжала заначка, трэба было кудысьці яе дзець — вось і дзелі.

— Я напісала ў Instagram, Google, Мінінфарм, міліцыю, на біржу — каб яны заблакавалі ашуканцаў. Знайшла кучу пацярпелых па ўсім свеце. Ва ўсіх адно пытанне — як вярнуць грошы. І звяртаюся да ўсіх — будзьце ўважлівыя, не губляйце грошы!

PS Як вярнуць выкрадзеныя ашуканцамі грошы

— Убіла ў пошукавік нешта накшталт «як вярнуць выкрадзенае ашуканцамі», і хутка рэклама падкінула мне кампанію, якая абяцае дапамагчы. Пакінула свой нумар тэлефона, мне ператэлефанавала дзяўчына.

Нібы прадбачачы ўсю гісторыю, яна адразу зразумела, што здарылася. Сказала, што ўсё вырашальна: па нумарах тэлефонаў, рэгістрацыях старонак і кашалькоў, грашовых пераводах яны ўсё знойдуць. А калі дастануць мае грошы, дык пакінуць сабе 15% ад сумы. Бяспройгрышна. Але не. Потым яна дадае: «У нас будуць невялікія выдаткі на даведкі, лісты і расследаванне — $200-300, іх трэба будзе аплаціць авансам».

Лена паклала трубку.