«Адміністрацыя калоніі дала станоўчае заключэнне па хадайніцтве Сафіі і прызнала, што ёю прынятыя ўсе меры для звароту па памілаванне. Далей яго будзе разглядаць камісія па пытаннях памілавання пры Лукашэнку, на гэта можа сысці каля 3 месяцаў», — сказаў Гашынскі.
Сапега падала прашэнне Лукашэнку праз адміністрацыю жаночай калоніі ІК-4 у Гомелі ў канцы чэрвеня 2022 года. Згодна з указам Лукашэнкі, камісія ўлічвае меркаванне адміністрацыі калоніі, а таксама характар, цяжар і ступень грамадскай небяспекі здзейсненага злачынства, асобу асуджанага, яго паводзіны, стаўленне да працы, удзел у самадзейнасці, тэрмін адбытага пакарання, пакрыццё нанесенай шкоды і іншыя абставіны.
Пра рашэнне адміністрацыі калоніі Сафія Сапега 6 верасня расказала па тэлефоне бацькам, кажа адвакат. Гэта пацвердзіла «Бі-бі-сі» маці дзяўчыны Ганна Дудзіч.
Сафія працуе ў калоніі швачкай. У перапісцы яна расказала маці, што працы шмат, усе працуюць без перапынку, здароўе з-за стрэсу «пакідае жадаць лепшага». «Жыве надзеяй на вызваленне, просіць не пазбаўляць яе гэтай надзеі, [піша], што без яе ёй ніяк», — расказала Ганна Дудзіч.
У адным з лістоў Сафія папрасіла маці паабяцаць ёй, што яна забярэ яе з калоніі. «Паабяцай мне, што ты мяне забярэш адсюль! Ты прыедзеш, мы пойдзем у краму і ты купіш мне торт і шмат прысмакаў, сядзем у машыну і паедзем дадому, я вельмі хачу дадому да вас, мае родныя», — напісала Соф'я.
Яна таксама распавяла пра свой стан:
«Што робіцца ўсярэдзіне, напэўна, параўнальна з развалінамі. Падмурак застаўся, нават нейкія сцены ацалелі, але ў цэлым усё разбурылася», — напісала яна.
Грамадзянка Расіі Сафія Сапега, затрыманая вясной 2021 года разам з Раманам Пратасевічам пры пасадцы ў Мінску самалёта авіякампаніі Ryanair, адбывае шасцігадовы тэрмін у калоніі за адміністраванне тэлеграм-канала «Чорная кніга Беларусі».
У аўторак на нарадзе Лукашэнкі было аб’яўлена пра амністыю, якая закране больш за 8 тысяч чалавек.
