Харкаўская вобласць, ліпень 2022 года. Фота: AP / Яўген Малалетка

Украінскі контрнаступ у Харкаўскай вобласці разграміў расійскія войскі, якія там базаваліся. Яны спешна пакідаюць паўднёвы ўсход Харкаўскай вобласці, каб пазбегнуць акружэння вакол Ізюма. Расійскія войскі раней аслабілі паўночную вось Данбаса, перадыслакаваўшы падраздзяленні з гэтага раёна на поўдзень Украіны, тым самым ускладнілі сабе задачу запаволіць украінскі наступ або, як мінімум, разгарнуць сілы прыкрыцця для адступлення.

Украінскія войскі прарвалі расійскія лініі ўглыб да 70 кіламетраў у некаторых месцах і захапілі больш за 3000 квадратных кіламетраў тэрыторыі за апошнія пяць дзён з 6 верасня — больш тэрыторыі, чым расійскія войскі захапілі з красавіка.

Украінскія войскі, хутчэй за ўсё, вызваляць сам горад Ізюм у найбліжэйшыя 48 гадзін, калі яны яшчэ гэтага не зрабілі, робіць выснову ISW.

Вызваленне Ізюма стала б самым значным ваенным дасягненнем Украіны з моманту перамогі ў бітве за Кіеў у сакавіку. Гэта выключыла б прасоўванне Расіі на паўночным захадзе Данецкай вобласці ўздоўж шашы Е40, якую расійскія вайскоўцы спрабавалі выкарыстаць для абыходу ўкраінскіх пазіцый з флангу ўздоўж лініі Славянск — Краматорск.

Расійскія вайсковыя карэспандэнты і блогеры таксама паведамлялі аб праблемах пры эвакуацыі з Ізюма — гэта сведчыць пра тое, што ўкраінскія сілы часткова закрываюць кацёл у некаторых раёнах.

Міністэрства абароны Расіі абвясціла аб адводзе войскаў з лініі Балаклея — Ізюм 10 верасня, ілжыва прадставіўшы адступленне як «перагрупоўку» сіл для падтрымкі расійскіх намаганняў у напрамку Данецкай вобласці.

Абвяшчэнне аб вывадзе войскаў, піша ISW, яшчэ больш адштурхнула расійскіх ваенных блогераў і нацыяналістаў, якія падтрымліваюць грандыёзнае бачанне Крамля ў захопе ўсёй Украіны. Расійскія ваенныя блогеры асудзілі Міністэрства абароны за тое, што яно заставалася ціхім, выбраўшы самаізаляцыю, і за скажэнне сітуацыйнай дасведчанасці ў Расіі.

Да абвяшчэння аб вывадзе войскаў Мінабароны Расіі апублікавала кадры расійскіх вайсковых калон, якія, як паведамляецца, 9 верасня рухаліся для ўзмацнення Харкаўскага кірунку. Многія расійскія СМІ і блогеры выказалі надзею, што гэтыя падмацаванні стабілізуюць лінію фронту і адаб'юць наступ украінскіх войскаў на Ізюм, нягледзячы на тое, што Мінабароны Расіі не змагло справіцца з сітуацыяй.

«Расійскія ваенныя блогеры, верагодна, прынялі б заяву Мінабароны аб вывадзе войскаў, як яны раней паступілі з адступленнем расіян з вострава Змяіны і іншымі тактычнымі стратамі, калі б расійская інфармацыйная прастора не была перанасычаная кадрамі ўкраінскіх поспехаў», — мяркуе ISW. 

Расійскія блогеры таксама раскрытыкавалі акупацыйныя ўлады за няздольнасць арганізаваць эвакуацыю ў Харкаўскай вобласці. Некаторыя блогеры адзначылі, што акупацыйныя адміністрацыі дэзарыентаваныя і ім не хапае ініцыятывы. Украінскі контрнаступ фактычна паралізуе акупацыйнае кіраўніцтва, якое, верагодна, баіцца за свой лёс.

Клас
Панылы сорам
Ха-ха
Ого
Сумна
Абуральна

Хочаш падзяліцца важнай інфармацыяй ананімна і канфідэнцыйна?

Каб пакінуць каментар, калі ласка, актывуйце JavaScript у наладах свайго браўзеру