«Як вы лічыце, ці павінна Польшча закрыць усе пераходы на польскай мяжы з Беларуссю?», — такое пытанне было зададзенае ўдзельнікам апытання.
Сцвярджальна адказалі 54,1% рэспандэнтаў. Адказ «не» далі 28,4%. 17,5% не маюць думкі па гэтым пытанні.
«6 з 10 рэспандэнтаў ва ўзросце ад 25 да 34 гадоў і крыху меншая частка (57%) рэспандэнтаў з сярэдняй адукацыяй лічаць, што памежныя пераходы паміж Польшчай і Беларуссю павінны быць закрытыя. 63% рэспандэнтаў з гарадоў з насельніцтвам ад 100000 да 199000 чалавек і такая ж доля рэспандэнтаў (62%) з прыбыткам ад 4001 да 5000 злотых нета (900 — 1130 USD) лічаць, што Польшча павінна закрыць усе памежныя пераходы з Беларуссю», — пракаментаваў вынікі старшы менеджар праекта SW Research Адам Ястржэнбскі.
Апытанне праводзілася сярод карыстальнікаў анлайн-панэлі SW Panel з 28 лютага па 1 сакавіка. Аналізам была ахопленая група з 800 інтэрнэт-карыстальнікаў, старэйшых за 18 гадоў. Выбарка была адабраная на аснове выпадковых квот.
Пасля абвяшчэння прысуду журналісту Андрэю Пачобуту Польшча прыпыніла працу пункта пропуску «Баброўнікі». А ў адказ на новыя недружалюбныя крокі з боку Беларусі з 21 лютага абмежавала рух беларускіх грузавых аўтамабіляў праз памежны пераход «Кукурыкі-Казловічы».
