29 сакавіка Міністэрства здароўя Беларусі ладзіць семінар «Інавацыйныя падыходы да ранняй дыягностыкі і суправаджэння дзяцей з аўтызмам». Семінар пройдзе на базе Беларускай медыцынскай акадэміі паслядыпломнай адукацыі. На яго запрасілі навукоўцаў, педагогаў, псіхолагаў, лекараў і бацькоў дзяцей з асаблівасцямі развіцця.
Сярод дакладчыкаў у праграме семінара заяўленая «па ўзгадненні» Вольга Філістовіч, дырэктарка Цэнтра прыкладнога аналізу паводзін «Метад АВА». Тэма яе дакладу — «Псіхакарэкцыйныя методыкі, якія ўжываюцца ў працы з дзецьмі з РАС (расстройства аўтыстычнага спектру»).
Магчымы ўдзел Вольгі Філістовіч у семінары абурыў бацькоў дзяцей з асаблівасцямі і лекараў. Яны падрыхтавалі калектыўны зварот да Міністэрства аховы здароўя.
«Ні цяпер, ні ў далейшым мы не будзем пакідаць без увагі, што службовая асоба, якая прапагандуе антынавуковыя, дыскрымінацыйныя, прыніжальныя выказванні, разглядаецца ў якасці запрошанай на мерапрыемства такога высокага ўзроўню, фактычна прымаючы ўдзел у фармаванні дзяржаўнай палітыкі», — напісалі аўтары звароту ў Міністэрства аховы здароўя.
Яны кажуць, што «да глыбіні душы абураныя» тым, што сярод удзельнікаў мерапрыемства ёсць такая асоба, як Вольга Філістовіч, і просяць звярнуць увагу на гэтую дакладчыцу і яе скандальныя выказванні ў верасні 2022 года.
Чытайце пра Вольгу Філістовіч падрабязней:
Мінулагодні выступ у Баранавічах таксама абурыў грамадскасць. У Міністэрства адукацыі накіравалі зварот ад бацькоў дзяцей з асаблівасцямі развіцця, які падпісалі 2228 чалавек. А таксама зварот ад лекараў, псіхолагаў, педагогаў, іншых спецыялістаў, якія працуюць з дзецьмі з асаблівасцямі псіхафізічнага развіцця і членамі іх сем’яў. Яго падпісалі 1254 чалавекі.
Па выніках праверкі Міністэрства адукацыі дало адказ. Спецыялісты ведамства зазначылі, што «выказванні Філістовіч аб этыалогіі ўзнікнення аўтызму супярэчаць існуючым навукова абгрунтаваным тэорыям і сучаснай практыцы навучання, сацыялізацыі дзяцей з аўтызмам», «змест гэтых выказванняў супярэчыць дзяржаўнай палітыцы ў сферы адукацыі».
Фрагмент адказу Міністэрства адукацыі Беларусі
Міністэрства адукацыі накіравала ліст Вользе Філістовіч, дзе папярэдзіла пра недапушчальнасць выкарыстання ў публічных выступах «выказванняў дыскрымінацыйнага, абразлівага характару ў адрас дзяцей з расстройствам аўтыстычнага спектру, фармаванне негатыўнага вобразу чалавека з аўтызмам».
Апроч гэтага, Мінадукацыі прыцягнула да дысцыплінарнай адказнасці некаторых педагогаў з баранавіцкай школы.
Чытайце таксама:
