Фота: Richard Drew / AP
Кампанія Twitter прыгразіла судом кампаніі Meta, якая валодае фэйсбукам і інстаграмам. Нагода — новая сацсетка Threads, якая даволі падобная да Twitter.
Як паведаміла ў чацвер вечарам выданне Semafor, юрыст Twitter Алекс Спіра ў сераду паслаў кіраўніку Meta Марку Цукербергу афіцыйны ліст, у якім абвінаваціў Meta ў «сістэматычным, зламысным і незаконным прысваенні камерцыйных таямніц і іншай інтэлектуальнай уласнасці кампаніі Twitter» пры стварэнні сеткі Threads.
«Канкурэнцыя — гэта добра, але падман — не», — напісаў уладальнік Twitter Ілан Маск у сваёй сацсетцы.
Праграма сацсеткі Threads была запушчаная ў сярэдзіне гэтага тыдня, і ў ёй зарэгістравалася ўжо каля 30 млн чалавек. Кіраўніцтва Meta першапачаткова заяўляла, што гэтая сетка будзе альтэрнатывай Twitter.
Сацсетка Threads даволі падобная да Twitter і вонкава, і па функцыянале.
Алекс Спіра ў сваім лісце, у прыватнасці, абвінавачвае Meta ў тым, што кампанія наняла дзясяткі былых супрацоўнікаў Twitter, якія да гэтага часу маюць доступ да сакрэтаў кампаніі і якія дапамаглі скапіяваць гэтую сацсетку.
Юрыст Twitter патрабуе, каб Meta неадкладна спыніла карыстацца гэтымі сакрэтамі і пагражае судом.
Прэс-сакратар Threads Эндзі Стоўн напісаў у гэтай жа сетцы, што на самай справе ў тэхнічнай камандзе Threads няма ніводнага былога работніка Twitter.
Чытайце таксама:
Meta запускае новы сэрвіс Threads — непасрэднага канкурэнта Twitter
Цукерберг апублікаваў першы за 11 гадоў маўчання твіт. І гэта іронія
Meta запусціла новы сэрвіс Threads. Шмат хто называе яго «забойцам твітара»
