Jakubovič: Biełaruskaja žurnalistyka robić na mianie vielmi sumnaje ŭražańnie
Hałoŭny redaktar «Sovietskoj Biełorussii» ličyć, što kankurentaŭ u jahonaj hazety niama
02.08.2007 / 13:22
«Biełaruskaja žurnalistyka robić vielmi i vielmi sumnaje ŭražańnie, najpierš tamu, što niama žurnalisckich zorak» — takoje mierkavańnie ŭ intervju kampanii BiełaPAN vykazaŭ hałoŭny redaktar haziety «Sovietskaja Biełorussiia» Pavieł Jakubovič. Intervju prymierkavanaje da 80‑hoddzia vydańnia, što adznačajecca 2 žniŭnia.
«Našy haziety zabity štampami. Na FM‑radyjo — natoŭp hetak zvanych dy‑džejaŭ, ludziej nieadukavanych, jakija i nie imknucca takimi stać. U ahienctvach raspaŭsiudžany arhumient: ja, maŭlaŭ, infarmacyjščyk — kab utaić, što nie znajomyja sa stylistykaj i nie mohuć pryhoža raskazać navat ab samym prostym faktie», — skazaŭ hałoŭny redaktar. A niekatoryja haziety, pavodle jaho słoŭ, «vychodziać prosta pa‑za kantekstam času». Na padstavie ŭsiaho hetaha P.Jakubovič ličyć, što kankurentaŭ u «Sovietskoj Biełorussii» niama.
Razam z tym, zaznačyŭ jon, «dobryja haziety ŭ nas jość u rehijonach — i ŭ Breście, i ŭ Hrodna («Zaria», «Viečiernij Briest», «Viečiernij Hrodno»)». «Vielmi nieachvotna (bo jany niekalki razoŭ u dačynieńni da mianie pastavilisia niekarektna) nazavu «Biełhazietu». Addaju daninu jaje vynachodlivaści i kreatyŭnaści, praŭda, ja liču, nie treba im hnacca za pravincyjaj, heta całkam staličnaja hazieta», — skazaŭ P.Jakubovič.
Jon ličyć, što «razmova ab «ideałahičnym składalniku «SB» — heta pytańnie interpretacyi». «Kali hazietu čytajuć 500 tysiač čałaviek — značyć, jany padzialajuć redakcyjnuju «ideałohiju», — miarkuje hałoŭny redaktar.
P.Jakubovič paviedamiŭ, što siońnia ŭ «Sovietskoj Biełorussii» 330 tys. indyvidualnych padpisčykaŭ, 10‑20 tys. (a pa piatnicach — da 100 tys.) asobnikaŭ pradajecca ŭ roźnicu, astatniaje (pryblizna 70 tys.) — raspaŭsiudžvajecca pa viedamasnaj padpiscy. «Jana zaŭsiody była na ŭzroŭni 20‑30 tysiač. Paźniej uklučyŭsia «administracyjny resurs», jaki dabaviŭ jašče 50 tysiač. Ja da hetaha nijakaha staŭleńnia — ni pazityŭnaha, ni niehatyŭnaha, ni arhanizacyjnych adnosinaŭ nie maju. Bo heta ideałahičnaja zadača miascovych orhanaŭ ułady, jakija kłapociacca ab tym, kab jurydyčnyja asoby na ich terytoryjach byli padpisany na respublikanskija, miascovyja i abłasnyje haziety», — skazaŭ P.Jakubovič.
Jon taksama śćviardžaje, što vychad «Sovietskoj Biełorussii» napiaredadni bujnych palityčnych kampanij (refieriendumu 1996 hoda, prezidenckich vybaraŭ 2001 i 2006 hadoŭ) biaspłatnymi nakładami pa 3,5 młn. asobnikaŭ rabiŭsia za košt redakcyi. «Heta taksama byŭ peŭny markietynhavy chod. Kožny, chto atrymaŭ biaspłatny asobnik haziety, — patencyjalny padpisčyk. Dziaržaŭny biudžet da hetaha nie maje dačynieńnia», — padkreśliŭ hałoŭny redaktar.