Kastuś Šytal: Nielha, kab sprava Łazara pasiejała niedavier da biskupaŭ
09.08.2013 / 12:50
Sprava ksiandza Uładzisłava Łazara — ciomnaja. Vidavočna, dziaržava maje niejki intares, kab nie pralivać na jaje śviatło. Pry kožnaj kryminalnaj spravie paviedamlajecca abvinavačvańnie, chto zatrymany, miera strymańnia, akaličnaści spravy časam paviedamlajucca, a časam chavajucca ŭ intaresach śledstva. Ale pa spravie ks. Łazara my nie viedajem navat, pa jakim artykule jaho vinavaciać.
Možna tolki zdahadvacca, čaho choča ŭłada. Dapamohi vatykanskaj dypłamatyi, niejkich krokaŭ z boku Kaścioła, ci prosta choča trymać u Kaścioł u napružańni? Ciemra — zručnaje asiaroddzie dla złačyncaŭ: my zdahadvajemsia, što niešta niechta robić, ale nie možam razhledzieć, chto i što. My sprabujem rabić u ciemry niejkija kroki, ale nie bačym, jaki budzie ich vynik.
Jašče ŭ ciemry lohka sutyknucca łbami. Praduhledžvali heta inicyjatary aryštu ks. Łazara ci nie, ale hetaja sprava ŭzmacniaje napružańnie ŭnutry Kaścioła.
Pytańnie pra toje, nakolki Kaścioł pavinien być łajalny da dziaržavy — adno z samych vostrych. Ciapier jano znoŭ aktualnaje.
Siońnia katoliki horača spračajucca MIŽ SABOJ, što pavinien rabić Kaścioł u spravie ksiandza Łazara. Śvieckija vierniki źviartajucca da biskupaŭ, biskupy maŭčać. Z adnaho boku hučać hałasy: «Voś kab nie maŭčali…» Ź inšaha: «Maŭčycie, kab nie naškodzić!» U klerykalnym asiaroddzi, nie vyklučana, taksama jość roznahałossi. Mahčyma, BCHD pačnie zbor podpisaŭ za vyzvaleńnie — i pačnucca jenki, što BCHD robić sabie pijar i škodzić Kaściołu.
Sumniajusia, što my možam čymści naškodzić ks. Łazaru. Naškodzić — pasadzić śviatara — moža tolki dziaržava. Ničoha niezvarotnaha niama: možna dašyć spravu i pasadzić — a možna zakryć spravu i vypuścić. Ale dziaržava ličyć za lepšaje patrymać śviatara ŭ zakładnikach, a Kaścioł u napružańni. Tym časam my abvinavačvajem ADNO ADNAHO i svarymsia ADZIN z ADNYM.
Nie sumniavajciesia: niedavier, varožaść, padzieły ŭnutry Kaścioła vyhadnyja jakraz dziaržavie.