Aktyvistka ruchu «Akupaj piedafilaj» raspaviadaje pra mietady adłovu «achviar»

10.08.2013 / 10:03

Za «nibyta piedafiłaŭ», jakich vykryvajuć u videazapisach supołki «Akupaj piedafilaj», zastupiŭsia navat pres-sakratar minskaj milicyi. Dniami stała viadoma i pra kankretnuju kryminalnuju spravu, jakuju raspačali datyčna dvaich «palaŭničych».

Jość i inšy bok miedala. «Palaŭničyja» demanstrujuć skrynšoty pierapisak, dzie padletkam robiać kankretnyja sieksualnyja prapanovy.

«Paciarpiełyja» ad dziejańniaŭ «palaŭničych» razmaŭlać ź Jeŭraradyjo nie zachacieli. Zatoje vykazałasia aktyvistka supołki «Akupaj piedafilaj».

Studentka K. nie tak daŭno stała paŭnaletniaj, jana žyvie ŭ adnym z paleskich rajcentraŭ. Jaje paplečniki «palujuć» nie tolki ŭ svaim horadzie, ale i pa ŭsioj krainie.

Palaŭničaja na piedafiłaŭ: «Pieršy vypadak byŭ taki. Adnamu našamu 15-hadovamu chłopcu prosta „UKantakcie“ napisaŭ mužčyna z Homiela. Tamu było 44 hady. Pačynaŭ razmovu narmalna, nazyvaŭ padletka „siabram“, a potym pačaŭ prapanoŭvać jamu namiokami zaniacca… nu, vy zrazumieli čym. Sam hety mužčyna pracavaŭ pradaŭcom vopratki. Prynadzie našaj jon, darečy, pryvioz u padarunak dźvie futbołki, padaryć chacieŭ. Hamialčanin cikaviŭsia sieksualnaj rolaj chłopca (aktyŭ toj ci pasiŭ), abiacaŭ navat hrupavuchu z mułatam».

— I što, pierapiska zachavałasia?

Palaŭničaja na piedafiłaŭ: Tak. Jość i aŭdyjozapisy, i videazapisy. Chłopiec papiaredziŭ, što jamu 15 hadoŭ. Ale hamialčuk usio adno zachacieŭ pryjechać. I pryjechaŭ. Pakul išli, raspaviadaŭ pra nudysckija plažy ŭ Homiela, dzie źbirajucca hiei. Potym my jaho vyłavili, choć asabliva nie viedali, jak piśmienna dziejničać. Jon nastojvaŭ, što pryjechaŭ prosta pahulać».

— Vy jaho bili?

Palaŭničaja na piedafiłaŭ: Nie, i zimoj hołym biehać nie prymušali, nie schilali pić maču, jak heta robicca ŭ Rasii. My ź im pahavaryli i adpuścili. Potym byli ŭ nas prablemy, pisali z Homiela i pahražali, što nas pasadziać, što nakirujuć jurystaŭ. Taksama nas chacieli padstavić homielskija, pryjazdžali pomścić, ale ŭ ich nie ŭdałosia.

— Ci łavili vy jašče niekaha?

Palaŭničaja na piedafiłaŭ: Tak, adnaho viadomaha dyryžora. Na sajcie znajomstvaŭ jon sam prapanoŭvaŭ sustrecca z našaj prynadaj, cikaviŭsia, ci jość miesca dla sustrečy. Kali sustrełasia, dyryžor prasiŭ zrabić usio chutka. Žyviec paskardziŭsia, što nikoli takoha nie sprabavaŭ. Dyryžor skazaŭ, što navučyć. Potym dałučylisia my. Paśla hetaha vypadku da nas naviedvałasia milicyja, praviarali. My skazali, što heta pastanoŭka. A dyryžor sam prapanavaŭ vyrašyć našy techničnyja prablemy: kupić kamieru, štatyŭ i inšaje. Tamu videa my ŭ vyniku nie vykładali.

— A ź minskaj supołkaj, jakuju zaraz prycisnuli, vy kantakt padtrymlivajecie?

Palaŭničaja na piedafiłaŭ: Tak. Ich hrupa akazałasia bolš chadavoj. A kiraŭnik jaje, R., uvohule niepaŭnaletni i pačynaŭ łavić kankretna na siabie.

— Ale ž ablivali «nibyta piedafiłaŭ» mačoj…

Palaŭničaja na piedafiłaŭ: R. raskazvaŭ, što nasamreč heta byŭ čaj, a nie mača. Byŭ vypusk, z jaŭrejem-ramantykam. I mahło skłaścisia ŭražańnie, što jaho troški prycisnuli. Ale na mnohich videa vidać, što fizičnaha ŭździejańnia na złoŭlenych nie było. U Biełarusi inšyja praviły hulni, i takija mietady ― niebiaśpiečnyja.

— Składvajecca ŭražańnie, što ŭdzielniki «Akupaj piedafilaj» prytrymlivajucca nacysckich pohladaŭ…

Palaŭničaja na piedafiłaŭ: I našy, i minskija ― daloka nie ŭsie prytrymlivajucca takich pohladaŭ. Mnohija navat nie futbolnyja fanaty.

— Ale čamu «palaŭničyja» łoviać mienavita hiejaŭ?

Palaŭničaja na piedafiłaŭ: «Akupaj piedafilaj» ― arhanizacyja rasijskaja, jaje stvaryŭ Ciasak (šoŭmen nieanacysckich pohladaŭ. ― zaŭv. kar.). Jon sam niekali łaviŭ na maleńkich dziaŭčatak. Ale tyja, što bolš pahłyblena vyvučajuć temu, skazali mnie, što Ciasak admoviŭsia łavić na dziaŭčatak, bo jon, jak prakamientavaŭ, choča takich sam. Da taho ž niekatoryja 13-hadovyja dziaŭčynki vyhladajuć daloka nie na 13. Ale kankretna my ŭsio adno łovim na maleńkich dziaŭčatak.

— Dyk jakaja ŭ vas pazicyja pa hiejach?

Palaŭničaja na piedafiłaŭ: U Rasii jość arhanizacyja, jakaja łović małaletnich hiejaŭ, što vystaŭlajuć siabie na prodaž. Ale ŭ nas u Biełarusi mała takich. Tym nie mienš ludziej nietradycyjnaj aryjentacyi mnohija nienavidziać. Kažuć, z-za taho, što nienaviśniki ― sami łatentnyja hiei, jakija nie chočuć u hetym pryznavacca.

— Paśla taho jak na «palaŭničych» źviarnuła ŭvahu milicyja, ci źmianili vy punkt hledžańnia nakont mietadaŭ baraćby?

Palaŭničaja na piedafiłaŭ: Ja liču, što ź piedafiłami treba kamunikavać, pravodzić prafiłaktyčnyja hutarki. Kali ich ablivajuć mačoj, heta darma. Prablema, što zamała ŭvahi piedafiłam nadajuć u pravaachoŭnych orhanach. Dla milicyi internet-pierapiska ― heta nie dokaz. Ale ci pravilna heta? Zamiest taho, kab zaniacca internetam, jany čakajuć vykliku: «Mužčyna zhvałciŭ maleńkaha chłopčyka ci dziaŭčynku». U internecie dziejecca raspusta. Na dziaciej cisnuć, prapanoŭvajuć hrošy za seks, abiacajuć, što im spadabajecca. Heta zvyčajnaja psichałohija. My ž sprabujem zmahacca ź piedafilijaj u internecie, pakul pasiŭničajuć pravaachoŭnyja orhany.