Biełaruś i Kitaj pačali pieramovy ab budaŭnictvie AES
Zajaviŭ u čaćvier na pres-kanferencyi pasoł Kitaju ŭ Biełarusi U Chunbiń.
20.09.2007 / 13:42
“Pieramovy miž biełaruskim i kitajskim bakami nakont budaŭnictva ŭ vašaj krainie atamnaj stancyi tolki pačalisia, tamu ničoha kankretnaha ja skazać pakul nie mahu. Ja viedaju tolki, što biełaruski bok zacikaŭleny ŭ našych pasłuhach”, – zajaviŭ u čaćvier na pres-kanferencyi pasoł Kitaju U Chunbiń.
Taksama dyplamat paviedamiŭ, što Kitaj zacikaŭleny ŭ investycyjach u biełaruskuju ekanomiku. Sioleta suma investycyjaŭ składzie kala 40 miljonaŭ dalaraŭ. Najbolšymi jany buduć u halinie mabilnaj suviazi. Kitajskaja kampanija “Šanchaj Alkatel” užo nia pieršy hod viadzie sumiesnuju pracu ź biełaruskim sotavym aperataram BIEST. Užo dasiahnutaja damoŭlenaść pa sumiesnym vypusku televizaraŭ kitajskim pradpryjemstvam “Medyja Hrup” i biełaruski “Haryzont”. Spadar pasoł adznačyŭ, što abjom vypuskajemych televizaraŭ budzie dosyć istotnym.
Jašče było adznačana, što kitajcy zacikaŭlenyja ŭ investycyjach u cemientny zavod i fabryku pa vyrabie DSP. Viaducca pieramovy pra adkryćcio ŭ Miensku pradstaŭnictva kitajskaha banku raźvićcia. Jašče sioleta była dasiahnutaja damoŭlenaść ab tym, što kitajcy buduć pravodzić rekanstrukcyju mienskaj TEC-2.
Siarod inšaha, U Chunbiń paviedamiŭ, što na siońniašni dzień u Biełarusi navučajecca kala dźviuch tysiač kitajskich studentaŭ. “Siońnia nie viadziecca havorka pra pryciahnieńnia novych studentaŭ u vašu krainu, havorka viadziecca pra pašyreńnia internataŭ biełaruskich VNU, kab usim chapiła miesca”, – adznačyŭ pasoł.