Жбанаў збіраўся паставіць у Мінску скульптуру хакеіста
Сёння ў Музеі сучаснага выяўленчага мастацтва адкрываецца мемарыяльная выстава Уладзіміра Жбанава «Ад мяне».
12.03.2014 / 20:30
Творца, які памёр два гады таму, атрымаў вядомасць шэрагам гарадскіх скульптур.
Першай з іх была «Незнаёмка», усталяваная ў 1998 годзе ў Міхайлаўскім скверы. Пазней там жа з’явіліся «Курэц» і «Дзяўчынка з парасонам», «Дама з сабачкам» і «Фатограф» на Камароўскім рынку, «Экіпаж» ля Мінскай ратушы.
Арганізатары выставы хочуць паказаць публіцы невядомага Жбанава.
У музеі будуць паказаны іншыя творы скульптара, якія мусілі быць усталяваныя ў Мінску. Так, Жбанаў планаваў паставіць каля ўваходу ў гатэль «Мінск» швейцара.
Потым высветлілася, што ставіць скульптуры на праспекце забаронена.
Каля «Чыжоўка-Арэны» Жбанаў спадзяваўся паставіць скульптуру «Паядынак», прысвечаную хакею.
Але дарабіць яе не паспеў.
Выстава будзе працаваць да 29 сакавіка.