Polšča vysłała vajskovaha ataše Biełarusi, abvinavačvaje ŭ špijanažy na Rasiju
Krynica ŭ polskim MUS: Biełaruskija śpiecsłužby pracujuć na Rasiju, śpiecyjalizujucca na Polščy.
14.03.2014 / 14:59
Vajskovaha ataše ambasady Biełarusi ŭ Polščy paprasili pakinuć terytoryju Polščy. Kontrraźviedka Ahienctva ŭnutranaj biaśpieki ličyć, što jon zajmaŭsia špijanažam na karyść Rasii.
Pavodle wyborcza.pl, vajskovaha ataše Biełarusi złavili pracaŭniki kontrraźviedki z Ahienctva ŭnutranaj biaśpieki, kali toj fatahrafavaŭ vajskovyja abjekty ŭ Bydhaščy. Jak daviedałasia Radyjo «TOK FM», hetyja abjekty zjaŭlajucca navučalnym centram NATO.
«Jon [dypłamat z Biełarusi] zašmat sabie dazvalaŭ», – pačuli karespandenty haziety «Dziennik», kali paprasili prakamientavać hety vypadak pradstaŭnikoŭ siłavych ministerstvaŭ.
«My nie bačym roźnicy miž biełaruskimi i rasijskimi špijonami, — skazała «Haziecie vyborčaj» krynica ŭ polskim Ministerstvie ŭnutranych spraŭ. — Abiedźvie krainy supolna viaduć raźviedvalnuju i kontrraźviedvalnuju dziejnaść, kirujuć jakoj rasijanie. I ŭ ramkach hetaj supolnaj dziejnaści biełarusy «śpiecyjalizujucca na Polščy». Heta značyć, što lubuju infarmacyju, jakuju jany zdabyvajuć u našaj krainie, my traktujem jak takuju, jakaja pieradajecca Rasii», — skazała krynica.
Vajskovy ataše Biełarusi — heta adzin z dvuch vyjaŭlenych u Polščy špijonaŭ, pra jakich paviedamlałasia ŭčora. Inšy špijon byŭ zatrymany značna raniej.
Jon trapiŭ u ruki Słužby vajennaj raźviedki Polščy dva hady tamu. Užo tady Apielacyjnaja prakuratura vystaviła jamu abvinavačańnie ŭ špijanažy. Z taho času biełarus zastajecca pad aryštam.
Pra hetuju historyju viedała tolki vuzkaje koła ludziej u Polščy, adznačyŭ pradstaŭnik siłavych viedamstvaŭ. Tolki ciapier, kali ŭ sud trapiŭ akt abvinavačańnia, stała viadoma bolš padrabiaznaściaŭ.
Pavodle dźviuch krynicaŭ haziety «Dziennik», situacyja sa špijonami z Biełarusi — vielmi nietypovaja, tamu praca polskich słužbaŭ i prakuratury nad abvinavaŭčymi vysnovami doŭžyłasia bolš za dva hady. Prablema palahała na tym, padaje vydańnie, što toj hramadzianin Biełarusi raniej supracoŭničaŭ z rasfarmavanaju niekalki hadoŭ tamu Vajskovaj infarmacyjnaju słužbaju Polščy.
Kiraŭnictva addziełu, što zajmałasia raźviedkaju, ličyła jaho svajoj krynicaju ŭ biełaruskich śpiecsłužbach, a jaho samoha razhladała jak kaštoŭnaha supracoŭnika, jaki pieradavaŭ vielmi istotnuju infarmacyju pra biełaruskuju armiju.
Za svaje pasłuhi ad polskaha boku jon atrymlivaŭ ščodryja ŭznaharody — da niekalkich sotniaŭ tysiač dołaraŭ.
«Nasamreč, jon byŭ dezinfarmataram», — raspavioŭ adzin sa śledčych. Tolki ŭ polskaj Słužbie vajskovaj raźviedki, jakaja paŭstała paśla rospusku Vajskovaj infarmacyjnaj słužby, pa-novamu praanalizavali infarmacyju, jakuju davaŭ biełarus. Z časam vyśvietliłasia, što nasamreč jon vykonvaŭ zadańni dla śpiecsłužbaŭ Biełarusi, piša hazieta.