Minharvykankam u čarhovy raz admoviŭ u praviadzieńni pikieta suprać vajny va Ukrainie

24.09.2014 / 17:38

Minharvykankam u čarhovy raz admoviŭ ruchu «Za Svabodu» ŭ praviadzieńni pikieta kala pasolstva Rasii z patrabavańniem spynić vajennyja dziejańni va Ukrainie.

Nahadajem, ruch «Za Svabodu» vystupiŭ ź inicyjatyvaj arhanizacyi «karusieli pikietaŭ», prapanavaŭšy kožny dzień padavać zajaŭki na ich praviadzieńnie. U praviadzieńni pieršych pikietaŭ 19 i 20 vieraśnia było admoŭlena aktyvistam arhanizacyi Arciomu Lavie i Alesiu Marčanku na padstavie taho, što jany pryciahvalisia da administracyjnaj adkaznaści. Tak, 6 maja jany praviali kala pasolstva RF niesankcyjanavanuju akcyju salidarnaści z narodam Ukrainy i suprać rasijskaj akupacyi Kryma, za što byli asudžany na piać sutak aryštu.

Čarhovuju admovu na praviadzieńnie pikieta, zajaŭku na jaki padavała hramadskaja aktyvistka Taćciana Hračanikava, Minharvykankam rastłumačyŭ jaje nieadpaviednaściu zakonu «Ab masavych mierapryjemstvach». U pryvatnaści, paviedamlaje pres-słužba ruchu «Za Svabodu», čynoŭniki miarkujuć, što praviadzieńnie masavaha mierapryjemstva «nie budzie sadziejničać zachavańniu elemientaŭ dobraŭparadkavańnia i zialonych nasadžeńniaŭ, moža stvarać pieraškody piešachodnamu i transpartnamu ruchu, adciahvać uvahu vadzicielaŭ transpartnych srodkaŭ ad vykanańnia PDP». Aprača taho, dadali jany, u zajaŭcy «nie ŭkazany kankretnyja miery pa zabieśpiačeńni hramadskaha paradku i biaśpieki pry praviadzieńni masavaha mierapryjemstva».

«Čynoŭniki prajaŭlajuć fantaziju dla admoŭ, havorać absurdnyja rečy. Atrymlivajecca, nielha ni stajać, ni hulać, kali navat adzinočny pikiet stvaraje takija surjoznyja pieraškody», — zaznačyŭ člen savieta ruchu «Za Svabodu», adzin ź inicyjataraŭ «karusieli pikietaŭ» Arciom Lava.

Na jaho dumku, u čynoŭnikaŭ jość «ustanoŭka nie dazvalać nie tolki źviazanyja z ukrainskimi padziejami akcyi, ale i lubyja hramadzianskija inicyjatyvy».

Lava paviedamiŭ, što daty praviadzieńnia pikietaŭ kala rasijskaha pasolstva raźmierkavanyja siarod hramadskich aktyvistaŭ da 10 kastryčnika.