«Mova nanova» zapuskaje kursy biełaruskaj movy dla dzietak daškolnaha ŭzrostu
30.09.2014 / 18:04
Aśvietnicki brend «Mova nanova» zapuskaje kursy biełaruskaj movy dla dzietak daškolnaha vieku. Zaniatki buduć prachodzić na stałaj placoŭcy kursaŭ «Mova nanova» — u «Halerei Ŭ», pa ranicach u vychodnyja dni. Paśla taho, jak 29 vieraśnia kursy byli anansavanyja, na zaniatki zapisali ŭžo bolš za 30 dziaciej.
Arhanizatar kursaŭ «Mova nanova» Hleb Łabadzienka adznačaje, što ŭvieś minuły hod naviedniki kursaŭ dla darosłych nastojliva prapanoŭvali arhanizavać zaniatki i dla dziaciej. Niekatoryja navat sprabavali pryvodzić małych na zvyčajnyja kursy:
«Ideja kursaŭ dla dzietak visieła ŭ pavietry ŭvieś minuły hod. Sami ludzi prapanoŭvali. My bačyli, što jany pryvodziać z saboj dzietak na darosłyja kursy. Ale zrazumieła, što vysiedzieć dźvie hadziny dla ich składana. Raniej da kursaŭ dla dzietak nie dachodzili ruki, bo ciaham pieršaha navučalnaha hodu my arhanizoŭvali praces u Miensku i ŭ inšych haradach. A voś ciaham leta byŭ čas padumać pra heta i arhanizavać. Znajšłasia cudoŭnaja vykładnica Alena Cieraškova, dziakujučy jakoj hetyja kursy i startujuć».
Alena Cieraškova, jakaja budzie vieści zaniatki, — maci čatyroch biełaruskamoŭnych dzietak. Jana piša dla dziaciej vieršy, kazki, zahadki, pieśni, zajmajecca pierakładam, vydała zbornik paezii «U poŭny rost ci ŭstanu», a taksama niekalki knih dla dzietak. Alena maje namier arhanizavać navučańnie takim čynam, kab praces zasvojvańnia dzietkami biełaruskaj movy byŭ maksymalna nabližany da taho, jak heta adbyvajecca ŭ siamji. Tamu na zaniatkach budzie rabicca ŭchił na kamunikacyju pamiž dziećmi i baćkami:
«Dzieci buduć udzielničać u kursach razam z baćkami. Adna z metaŭ kursaŭ — abudžeńnie cikaŭnaści da biełaruščyny mienavita ŭ siemjaŭ. My nia budziem padmianiać saboj kursy padrychtoŭki da škoły, tamu što dzieci 4–6 hadoŭ pavinny hulacca — heta ich naturalny stan. Voś my i budziem ź imi hulacca, pastupova ŭciahvajučy ich u vyvučeńnie movy tak, jak jano adbyvajecca naturalnym šlacham u siamji — praz praces uzajemadziejańnia pamiž dziećmi i baćkami. Buduć peŭnyja temy, kab dzieci zasvojvali leksyku blokami. Ale heta nia budzie tak, kali treba zapisvać pad dyktoŭku i vučyć. Budziem imknucca padavać materyjał vielmi cikava — i praź litaraturnyja tvory, i praz mulciki».
Vykładčyca Alena Cieraškova z svaimi dziećmi
Vykładčyca kaža, što na kursy niepaźbiežna źbiarucca dzieci hramadzkich aktyvistaŭ i palitykaŭ, ale arhanizatary byli b rady bačyć tam i dziaciej ź siamiej, dalokich ad palityki.
«Zrazumieła, što aktyvisty nie zastanucca ŭbaku ad hetych kursaŭ. Ale dzieciam aktyvistaŭ jość chiba patreba ŭ kamunikacyi pamiž saboj. A voś my b byli vielmi rady bačyć na kursach dziaciej sa zvyčajnych siemjaŭ, dalokich ad palityki i aktyvizmu, ale jakija pavinny składać bazu hramadzianskaj supolnaści, bo biaź ich adny tolki aktyvisty ničoha nia zrobiać. Ideja nia ŭ tym, kab pryciahnuć pryciahnutych, a ŭ tym, kab da pryciahnutych dałučalisia ŭsio novyja i novyja koły hramadztva».
Alena Cieraškova ciapier pracuje ŭ dziciačaj tancavalna-spartovaj studyi «Dzietki plus», dzie viadzie biełaruskamoŭny hurtok. Vykładčyca adznačaje, što choć jana i nia maje pedahahičnaj adukacyi, na jakaści dziciačaj «Movy nanova» heta nie adabjecca.
«U mianie hłybokija nastaŭnickija tradycyi ŭ siamji. Maja maci bolš za 40 hadoŭ pracavała ŭ škole, ja šmat u čym joj dapamahała. Maje dzieci ŭžo chodziać u škołu, i ja supracoŭničaju ź ich nastaŭnikami, my razam ładzim roznyja mierapryjemstvy. Tamu tut ja spadziajusia na taki svoj dośvied. A ŭmieńnie pracavać ź dziećmi ŭ mianie jość».
Kursy biełaruskaj movy dla dzietak raspačnucca 4 abo 5 kastryčnika ŭ «Halerei Ŭ». Data stanie kančatkova viadomaja, kali padviaduć vyniki hałasavańnia na sajcie «Mova nanova».