Sud pakinuŭ u sile papiaredžańnie «Narodnaj voli» za kałonku Kalinkinaj, hazietu mohuć zakryć
dapoŭniena
23.01.2015 / 15:44
Śviatłana Kalinkina
Siońnia ŭ Viarchoŭnym sudzie Biełarusi skončyŭsia razhlad spravy «Narodnaja vola» vs Ministerstva infarmacyi.
Nahadajem, što niezaležnaje vydańnie abskardžvała papiaredžańnie Ministerstva infarmacyi ab raspaŭsiudzie niepraŭdzivaj infarmacyi. U vyniku sud pastanaviŭ pakinuć u sile papiaredžańnie Mininforma ad 18 listapada 2014 hoda.
Takim čynam, hazieta maje ŭžo dva papiaredžańni za adzin hod i na hetaj padstavie Ministerstva infarmacyi moža sankcyjavać zakryćcio vydańnia.
«Narodnaja vola» atrymała papiaredžańnie za kałonku šef-redaktara haziety Śviatłany Kalinkinaj «Na łancuh», apublikavanuju 3 kastryčnika. U joj aŭtarka pieraścierahaje pra faktyčnuju niemahčymaść samastojnaha vychadu Biełarusi ź Jeŭrazijskaha ekanamičnaha sajuza ŭ vypadku, kali damova ab ratyfikacyi JeAES budzie padpisana.
Kalinkina źviarnuła ŭvahu na toje, što artykuł 13 damovy ab JeAES dekłaruje zaležnaść krain-udzielnic sajuza ad voli inšych dziaržaŭ, bo rašeńni ab vychadzie krainy ź JeAES prymajucca pavodle pryncypa «kansensus minus hołas dziaržavy-siabra, jakaja paviedamiła pra svoj namier spynić svajo siabroŭstva ŭ Sajuzie».
Kalinkina, jakaja paličyła, što Rasija naŭrad ci adpuścić Biełaruś, napisała: «Dyk voś, vychad ź Jeŭrazijskaha ekanamičnaha sajuza ŭ vypadku čaho dla Biełarusi budzie niemahčymy. Jon prosta nie praduhledžany damovaj ab stvareńni sajuza. Adzin raz padpisalisia — i heta ŭžo nazaŭsiody».
Mienavita za hetu frazu i začapilisia čynoŭniki Ministerstva infarmacyi.
Jany spasłalisia na artykuł 118 toj samaj damovy, jakaja kaža, što «dziaržava-siabar maje prava vyjści z hetaha Dahavora, nakiravaŭšy depazitaryju hetaha Dahavora pa dypłamatyčnych kanałach piśmovaje paviedamleńnie pra svoj namier vyjści z hetaha Dahavora. Dziejańnie hetaha Dahavora ŭ dačynieńni da hetaj dziaržavy spyniajecca pa zakančeńni 12 miesiacaŭ z daty atrymańnia depazitaryjem hetaha Dahavora takoha paviedamleńnia».
Takim čynam, Mininfarmacyi ŭhledzieła ŭ frazie «vychad ź Jeŭrazijskaj ekanamičnaj sajuza ŭ vypadku čaho dla Biełarusi budzie niemahčymy. Jon prosta nie praduhledžany damovaj ab stvareńni sajuza» raspaŭsiud niepraŭdzivaj infarmacyi, jakaja moža pryčynić škodu dziaržaŭnym ci hramadskim intaresam, i abvinavaciŭ hazietu ŭ parušeńni art. 4 zakona Biełarusi «Ab SMI».
Padčas sudovaha śledstva pradstaŭniki Mininfarmacyi paviedamili, što praviali svajo vyvučeńnie Damovy ab JeAES, a taksama źviarnulisia ŭ Ministerstva zamiežnych spraŭ, jakoje ŭpaŭnavažana kamientavać mižnarodnyja damovy, zaklučanyja Biełarussiu. U vyniku Mininfarmacyi prajšło da vysnovy, što fraza Kalinkinaj nie adpaviadaje rečaisnaści.
Hałoŭny redaktar «Narodnaj voli» Iosif Siaredzič
«Narodnaja vola» nie pryznała papiaredžańnie Mininfarmacyi. Pradstaŭniki haziety zajaŭlali, što Ministerstva infarmacyi «vyrvała frazu z kantekstu», u toj čas jak u samoj kałoncy dvojčy ŭzhadvajecca pra toje, što šlachi vychadu ź JeAES isnujuć, i byli nazvanyja ŭmovy vychadu.
Abaronca haziety Andrej Bastuniec zajaviŭ pra toje, što Ministerstva infarmacyi błytaje raspaŭsiud infarmacyi i vykazvańnie ŭłasnaha mierkavańnia.
Bastuniec spasyłaŭsia i na mižnarodnuju praktyku: «Kali ŭziać praktyku AAN, Jeŭrapiejskaha suda pa pravach čałavieka, precedentnyja rašeńni hetych orhanaŭ kažuć pra toje, što pieraśled vykazvańnia mierkavańnia niedapuščalny». Bastuniec zajaviŭ chadajnictva ab pryznačeńni linhvistyčnaj ekśpiertyzy, jakaja vyznačyć, ci nosić kałonka Kalinkinaj formu vykazvańnia svajho mierkavańnia. Adnak suddzia Alena Kastrama nie znajšła padstaŭ dla ekśpiertyzy.
Padtrymaŭ Pastuchoŭ
«Narodnuju volu» i Śviatłanu Kalinkinu padtrymaŭ i zasłužany juryst Biełarusi i suddzia Kanstytucyjnaha suda Biełarusi I sklikańnia Michaił Pastuchoŭ.
U liście redakcyi, jaki byŭ začytany ŭ sudzie i dałučany da spravy, jon pahadžajecca z Kalinkinaj. Michaił Pastuchoŭ zasiarodziŭ uvahu na tym, što navat pry jurydyčnym vychadzie Biełarusi ź JeAES jana nie nabudzie realnuju svabodu:
«Pierad tym, jak vyjści z sajuza, treba vypłacić pa pazykach inšym dziaržavam-siabram i atrymać ad ich volnuju. Nakolki heta realna? Uiavim, jak pastupić Rasija, kali Biełaruś, razabraŭšysia ŭ situacyi, zachoča źbiehčy ŭ Jeŭropu. Na jakuju sumu Rasija acenić daŭhi našaj krainy? Dakładna skazać nichto nie zmoža, ale, vidać, da poŭnaha vykanańnia finansavych abaviazacielstvaŭ u ziamnym kalendary nie chopić hadoŭ.
Sychodziačy z pałažeńniaŭ Damovy i ŭličvajučy takuju pierśpiektyvu, žurnalist Śviatłana Kalinkina całkam mahła śćviardžać, što vychad ź JeAES dla Biełarusi budzie niemahčymy.
Z hetym śćviardžeńniem ja całkam zhodny. Kali chtości ličyć hety vyvad dezynfarmacyjaj ci dyskredytacyjaj źniešniaj palityki Biełarusi, chaj dakaža advarotnaje. Ja ŭpeŭnieny, nie atrymajecca».
«Jak suddzia kanstytucyjnaha suda I sklikańnia zajaŭlaju, što Damova ab stvareńni JeAES u tym vyhladzie, u jakim jon napisany i ratyfikavany, supiarečyć pałažeńniam Dekłaracyi ab dziaržaŭnym suvierenitecie i artykułam Kanstytucyi numar 1, 2, 3, 8 i inš. Vyjści z hetaj damovy Biełarusi sapraŭdy budzie niemahčyma», — dadaje Pastuchoŭ.
«Tolki ŭ Biełarusi za heta karajuć»
Padčas sudovych sprečak Śviatłana Kalinkina nahadała, što materyjał byŭ pryśviečany važnaj hramadskaj temie: abaronie suvierenitetu dziaržavy.
«Biełaruś nie adzinaja kraina, jakaja vykazvaje aściarohi nakont hetaj Damovy. U parłamiencie Armienii cełaja frakcyja nie hałasavała za jaje ratyfikacyju. U Kazachstanie padčas padpisańnia hetych dakumientaŭ ludzi nieśli ściahi z žałobnym krepam da manumienta niezaležnaści. Kirhizija adkłała ratyfikacyju damovy da maja.
U jakoj-niebudź krainie karali za vykazvańnie takoha mierkavańnia? Ni ŭ jakoj krainie, akramia, akazvajecca, Biełarusi».
Jana dadała, što takaja dyskusija nijakim čynam nie dyskredytuje Biełaruś, a naadvarot, dazvalaje «vyrašyć prablemy ŭ kanstruktyŭnym rečyščy».