Biełaruskamoŭny brytaniec: «Ja dumaŭ, što tut vielmi dzikaja i militaryzavanaja kraina»
Brytaniec Oŭen Braŭn nie pieršy hod vandruje pa śviecie. Jon paśpieŭ pažyć u Polščy, Litvie, Narviehii i Ukrainie, a paśla pryjechaŭ u Biełaruś, kab vučyć movy dy adkryć dla siabie novuju krainu.
05.05.2015 / 21:25
Jon kaža, što šmat chto ź jaho znajomych pajechaŭ vučyć ruskuju ŭ Rasiju ci Ukrainu, a jon vyrašyŭ rabić heta ŭ Biełarusi, tamu što mała viedaŭ pra jaje.
«Mnie zaŭsiody chaciełasia vandravać, znajomicca ź cikavymi ludźmi dy vučyć movy, ale ŭ majoj siamji nie było mahčymaści latać kudyści, tamu ŭ dziacinstvie ja tolki jeździŭ pa Brytanii na mašynie, — kaža chłopiec. — Kali źbiraŭsia ŭ Minsk, to admysłova ničoha nie čytaŭ pra jaho, chacieŭ, kab byŭ siurpryz».
Dyzajnier pa adukacyi, Oŭen zarablaje vykładańniem anhlijskaj movy jak zamiežnaj.
«Žyć u novaj krainie spačatku nie vielmi prosta, bo nie viedaješ movy, ale mnie heta navat padabajecca, tamu što ŭ žyćci pavinny być niejkija ciažkaści, i pieraadolvać ich vielmi cikava».
Užo na druhi miesiac žyćcia ŭ Minsku Oŭen pačaŭ vučyć biełaruskuju movu: na kinaprahladzie u DK «La Mora» jon paznajomiŭsia ź biełaruskamoŭnaj dziaŭčynaj i zachacieŭ taksama razmaŭlać pa-biełarusku. Vyvučyć novuju movu było nie składana, tamu što Oŭen užo viedaŭ polskuju i trochu ruskuju.
«Mnie padajecca, što kali b biełarusy mienš bajalisia trasianki, to bolš by razmaŭlali na rodnaj movie. Heta naturalna — rabić pamyłki, kali vyvučaješ movu, u hetym niama ničoha zahannaha. Uvohule, situacyja ź biełaruskaj nie vielmi dobraja, ale ja jaje razumieju. Zaŭsiody byli ludzi, jakija nie chacieli, kab biełarusy razmaŭlali pa-biełarusku, ale kali jany nie buduć, to chto budzie razmaŭlać?»
Hladzicie hutarku z Oŭenam u repartažy «NN»: