Školnikam namiaknuli: chočacie vypić na vypusknym — padumajcie pra heta zahadzia
15.05.2015 / 11:31
Nabližajucca apošnija zvanki i vypusknyja viečary ŭ škołach. U Minsku ŭžo papiaredzili: 30 maja i 12 červienia budzie abmiežavany prodaž ałkaholu.
Ałkahol — heta zło, praź jaho šmat bied u našym žyćci. Dastatkova pahladzieć milicejskija zvodki: dnia nie prachodzić, kab chtości nie pryrezaŭ sabutelnika. A časta raśpivajuć muž z žonkaj, baćki ź dziećmi. I tady ŭ adnoj siamji adrazu i trup, i siadzielec. Žachliva.
Ale ja pra abmiežavańni.
Za try tydni da apošniaha zvanka školnikam dali sihnał: chočacie adznačyć harełkaj zakančeńnie vučnioŭstva, zakuplajciesia zahadzia. Ja baču mienavita taki pasył.
Sam skončyŭ škołu 11 hadoŭ tamu. Ja nie vieru, što školniki, kali nadumali vypić, admoviacca ad hetaha: sapraŭdy zakupiacca zahadzia. Siarod vypusknikoŭ sustrakajucca ŭžo i 18-hadovyja. I im, pa zakonie, možna i pić, i kuplać ałkahol. A niepaŭnaletnim nielha hetaha rabić nie tolki ŭ dzień apošniaha zvanka albo vypusknoha, ale i va ŭsie astatnija dni. Dyk dla čaho hetyja abmiežavańni?
Kali inicyjatary abmiežavańnia tak pieražyvajuć za dziaciej, mohuć arhanizavać patruli kala kram. Łavicie za ruku pradaŭcoŭ, jakija nasupierak zakonu buduć adpuskać ałkahol niepaŭnaletnim.
Praŭda, u takim abmiežavańni budzie i vyklučeńnie — roźničny handal na abjektach hramadskaha charčavańnia ŭ raźliŭ.
V.a. načalnika Hałoŭnaha ŭpraŭleńnia achovy pravaparadku i prafiłaktyki MUS Aleh Karaziej na hetym tydni zajaviŭ pra toje, što chutka budzie zabaronieny prodaž ałkaholu va ŭsich kramach krainy z 22.00 da 09.00 (pakul zabarona dziejničaje pa rašeńni rajvykankamaŭ — nie zakanadaŭča). I rychtujecca zakonaprajekt, zhodna ź jakim śpirtnoje źniknie z zapravak.
«Dośvied mnohich krain, kaža Karaziej, śviedčyć, što ŭ niekatorych pytańniach dapamahajuć tolki žorstkija zabaronnyja ryčahi. Astatnija miery mohuć tolki spadarožničać. U dadzienym vypadku havorka viadziecca pra faktary, jakija padryvajuć asnovy hałoŭnaj kaštoŭnaści — siamji, a heta surjoznaja padstava dla rašučych, bieskampramisnych dziejańniaŭ», — pa vynikach zajaŭ milicejskaha načalnika napisała pres-słužba MUS.
Ale dzie hetyja «bieskampramisnyja dziejańni»? Čamu adrazu nie zrabić bolš žorstkimi ŭmovy prodažu ałkaholu?
Naprykład, tolki z 21 hoda. Razabracca narešcie z vytvorcami harełki, jakija pad hetaj ža markaj svabodna rekłamujuć pitnuju vadu. Zabaranić narešcie «čarniła» — tannaje vino. Prablemy z ałkaholem ža isnujuć nie pieršaje dziesiacihoddzie. A inicyjavać źmieny ŭ zakonie — va ŭładzie Ministerstva ŭnutranych spraŭ. Ci prablema ŭ ałkaholnym łobi?
Voś uviali kanfiskacyju aŭto ŭ pituščych kiroŭcaŭ, i kolkaść pjanych za rulom skaraciłasia.
Dyk rašycie ž prablemu pjanstva, a nie ŭdavajcie dziejnaść.