Сяргей Махнач. Не я валодаю мовай, мова валодае мной…

27.05.2015 / 17:07

Я не валодаю мовай –
Мова валодае мной.
Чую, здаецца, па новай
Гукаў абуджаных строй.

Мова мяне вывучае:
Хто я, чаму і куды?
Сумнай усмешкай страчае
Цераз бязмоўя гады.

Нешта мяне падштурхнула,
Нехта вядзе за руку.
Роднае слова кранула,
Каб апынуцца ў радку.

Просіцца верш на паперу,
Птушкаю б'ецца ў акне…
Здолее мова, я веру,
Вывучыць зноўку мяне.

27.05.2015