Časopis GEO spyniaje vychad u Rasii
19.11.2015 / 14:10
Stała viadoma, što studzieński numar papularnaha časopisa GEO, najchutčej, stanie apošnim u Rasii.
Pra heta ŭ kałoncy napisaŭ hałoŭny redaktar časopisa Uładzimir Jesipaŭ: «Kali b jašče dva hady tamu mnie skazali, što da kanca 2015-ha pamiž Maskvoj i Kijevam pierastanuć lotać samaloty, što ŭ stalicy pačnuć aryštoŭvać ukrainskich biblijatekarak, što ŭ aeraportach mytniki buduć pytacca suhramadzian, što viartajucca z-za miažy, ci viazuć jany z saboj «zabaronieny syr», što druhaja pa vieličyni avijakampanija krainy zbankrutujecca, a naš časopis zakryjuć, — ja b, napeŭna, u adkaz cicha ŭśmichnuŭsia i pakruciŭ palcam la skroni».
Jesipaŭ paviedamiŭ, što licejnzijnaja damova na vydańnie časopisa nie praciahnuta. Varta adznačyć, što raniej GEO vydavaŭ niamiecki kancern «Aksiel Šprynhier», ale pavodle novych papravak u Zakon ab ŚMI zamiežniki nie mohuć vałodać kantrolnym pakietam akcyj rasijskich vydaviectvaŭ.
Pavodle infarmacyi «Viedomostiej», novy ŭładalnik vydavieckaha kancerna Alaksandr Fiadotaŭ zajaviŭ, što spyniaje vychad časopisaŭ GEO, «Gala Biohrafija» i GEOlenok. U kancernie zastanucca tolki časopisy Forbes i OK! Zrešty, u «Forbsie» budzie źmieniena kancepcyja, vydańnie budzie mieniej pisać pra palityku.
Časopis GEO, jaki apaviadaŭ pra padarožžy, navukovyja adkryćci, pryrodu i historyju, zaŭsiody ličyŭsia prazachodnim i libieralnym. U Rasii jon vydavaŭsia ad 1998 hoda. Možna skazać, što ŭ Rasii pamienieje jašče na adno niezaležnaje vydańnie.
Tym nie mienš, Uładzimir Jesipaŭ nie hublaje nadzieju, što novy ŭładalnik usio ž moža znajścisia, ale šancaŭ na heta vielmi mała.
Z susiednich krain GEO taksama vychodzić u Litvie i Łatvii, a voś u Polščy i Ukrainie svaich viersijaŭ hetaha časopisu niama.