Źjaviŭsia servis dla poŭnaha vydaleńnia čałavieka ź internetu
Raspracoŭščyki z Šviecyi stvaryli anłajn-servis, jaki dazvalaje čałavieku mienš, čym za hadzinu vydalić siabie ź internetu, źniščyŭšy isnujučyja ulikovyja zapisy ŭ niekalki klikaŭ.
25.11.2016 / 21:36
Šviedskija raspracoŭščyki Vile Dalba i Linus Unebiek stvaryli servis, jaki dazvalaje čałavieku vydalić siabie ź internetu. Jak piša CNews co spasyłkaj na The Next Web, servis znachodzicca na sajcie deseat.me, i dostup da jaho ažyćciaŭlajecca praz akaŭnt Google.
Pry ŭvachodzie pad ulikovym zapisam dadatak skanuje ŭsie sacyjalnyja sietki i servisy, jakimi kali-niebudź karystaŭsia čałaviek, što vyrašyŭ zaviazać ź sieciŭnym minułym. Zatym stvarajecca śpis znojdzienaha i, klikajučy na ikonki, karystalnik vydalaje ślady svajoj prysutnaści ŭ internecie.
Pakolki sam servis faktyčna nie vydalaje akaŭnty i ŭlikovyja zapisy, a tolki źviartajecca da adpaviednych funkcyj staronak adpiski, naviedvalnik internetu moža heta zrabić i biez dapamohi deseat.me — adnak heta zojmie značna bolš času.
Što tyčycca šviedskaha servisu, pa zapeŭnieńni raspracoŭnikaŭ, poŭnaje vydaleńnie čałavieka ź internetu ź jaho dapamohaj zojmie nie bolš za hadzinu.
Ślady zastajucca zaŭsiody
Anłajn-servisy, jakija prapanujuć pasłuhi pa vydaleńni akaŭntaŭ u internecie, isnujuć nie pieršy hod. Adnak ałharytmy pracy takich sajtaŭ, jak JustDelete.me abo ŭžo niepracujučaha ciapier DeleteYourAccount.com, adroźnivajucca.
Da prykładu, AccountKiller.com prapanuje karystalniku abrać sa śpisu sacsietku abo servis, ź jakim jon chacieŭ by raźvitacca. Zatym pierajści na staronku z padrabiaznymi instrukcyjami pa samavydaleńni i hipierspasyłkami na staronku z adpaviednaj funkcyjaj.
Sajty padzielenyja na try katehoryi: «biełyja», «šeryja» i «čornyja». Z «biełych» vydalicca praściej za ŭsio, z «šerych» — ź ciažkaściu, a z sajtaŭ u čornym śpisie ŭlikovy zapis vydalić vielmi składana. Tamu na ich staroncy paznačanyja adrasy e-mail techpadtrymki.
Stvaralniki AccountKiller.com papiaredžvajuć karystalnikaŭ, što, choć akaŭnt i vydaleny z sajta, ich danyja mohuć praciahvać zachoŭvacca ŭ inšym miescy — da prykładu, jakim-niebudź dampie pamiaci.
Raspracoŭniki adznačajuć, što dla paśpiachovaj pracy svajho servisu pa vydaleńni danych pracujuć z dostupam da infarmacyi pra karystalnikaŭ Google Analytics. Što tyčycca ałharytmu stvareńnia takoha servisu — raspracoŭščyki rastłumačyli, što karystalisia instrukcyjami z adkrytych krynic, a taksama paradami inšych udzielnikaŭ internet-supolnaści.