«Пара!»: у Беларусі выйшла манета са знакамітым заклікам да антымаскоўскага паўстання
17.04.2017 / 19:15
Прыватны праект «113 гарадоў Беларусі» выпусціў сувенірны «Адзін магілёўскі рубель».
Горад на аверсе ўвасабляюць ратуша, герб места і знакаміты заклік магілёўскага бургамістра Язэпа Левановіча «Пара! Пара!».
Гэтыя словы адносяцца да XVII стагоддзя, калі падчас вялікай 13-гадовай вайны паміж маскоўцамі і Рэччу Паспалітай магілёўцы вызвалілі ад акупантаў свой захоплены горад. Сігналам да пачатку паўстання стаў гэты адбіты на манеце вокліч бургамістра — «Пара!».
За дзень магілёўцы разграмілі маскоўскі гарнізон, і за гэта ўлады вярнулі гораду адабранае магдэбурскае права, а таксама надалі новы — сучасны — герб.
Сувенірная манета, прысвечаная Магілёву, выпушчаная накладам у 100 адзінак, замовіць яе можна ў вытворцаў — на сайце belmoneta.by.
У серыі «113 гарадоў Беларусі» гэта не першая манета — ужо выпушчаныя «рублі» Слуцка, Узды, Клецка ды іншыя.