Rasijanie abvinavacili Biełaruś u pastaŭkach lekaŭ z kavałkami škła
05.05.2017 / 15:35
Rasijski partał Łajf zajaŭlaje: pa infarmacyi žurnalistaŭ, u Rasiju trapili niajakasnyja rastvory dla injekcyj. Pastaŭščyk lekaŭ — biełaruskija pradpryjemstvy.
Ilustracyjnaje fota
U Kalininhradzie, Mardovii i Vałahodskaj vobłaści byli znojdzieny partyi antybijotykaŭ i rastvoraŭ dla injekcyj ź bitym škłom i miechaničnymi čaścicami ŭnutry, śćviardžaje Łajfńjuz. Preparaty zrobleny na zavodach Biełarusi.
Jakaść usich lekaŭ u Rasii praviaraje Raszdaroŭjenahlad: adbiraje proby, vyvučaje partyi tabletak, ampuł, sprejaŭ.
Pa infarmacyi rasijskich žurnalistaŭ, u apošnija miesiacy śpiecyjalisty znachodziać prymieški u lekach, jakija pastupajuć ź Biełarusi, lik idzie na dziasiatki ampuł.
«Za studzień — krasavik byli vypadki ŭ Kalininhradzie, u Čarapaŭcy i ŭ Saransku. Znajšli rastvory dla injekcyj i kropielnic z askiepkami škła i inšymi miechaničnymi čaścicami, — raspaviała krynica «Łajf» ŭ Raszdarojenahladzie. — My nakiravali infarmacyjnyja listy ŭ rehijony, kab tam kanfiskavali ŭsie padazronyja partyi preparataŭ hetych sieryj i źniščyli».
Va ŭsich pieraličanych vypadkach leki vyrabili biełaruskija zavody — RUP «Biełmiedpreparaty» i AAT «Barysaŭski zavod miedycynskich preparataŭ».
«Biełmiedpreparaty» pakul nie dali kamientar.
Pradstaŭniki Barysaŭskaha zavoda kažuć: takija vypadki adzinkavyja, a na pradpryjemstvie dziejničaje najstražejšy kantrol jakaści.
«Hetyja pamyłki isnujuć, ale ŭ nas tolki 0,1% zabrakavanych ad usich vypuščanych sieryj preparataŭ. I kali ŭ nas niešta vyjaŭlajecca, to my pravodzim rasśledavańnie i dakładvajem u Raszdaroŭjenahlad», — raspaviała namieśnik dyrektara pa jakaści Barysaŭskaha zavoda Taćciana Batura.
Pa słovach Batury, u vypadku, naprykład, z rastvoram pientaksifilina zavod na praciahu dvuch dzion paśla atrymańnia pradpisańnia z Rasii adreahavaŭ i pravioŭ ułasnaje rasśledavańnie: jakimi byli ŭmovy vytvorčaści i kantrolu jakaści na momant, kali vypuskali hetyja sieryi preparataŭ.
A ŭ vypadku ź bitym škłom u ampule kafieinu, kaža Batura, karcina, chutčej za ŭsio, vyhladała tak. Pry zalivie rastvora ŭ ampuły niejkaja ź ich łopnuła. Pabituju ampułu prybrali, ale adzin askiepak moh adskočyć u susiednija preparaty. Toje, što askiepak prapuścili, Batura tłumačyć čałaviečym faktaram.
Batura raspaviała, što paśla taho, što zdaryłasia, dadatkova praviali navučańnie supracoŭnikaŭ i pravieryli abstalavańnie. Jana dadała, što z nastupnaha hoda prahladać preparaty buduć nie tolki supracoŭniki: na zavodzie ŭviaduć sistemu aŭtamatyzavanaha kantrolu.