Biełaruś i Ukraina lidary. Pakul tolki ŭ piractvie
10.05.2017 / 10:02
Zhodna sa spravazdačaj kampanii Muso za 2016 hod, jakaja zajmajecca raspracoŭkaj technałohij dla baraćby ź piractvam, kožny biełaruski internet-karystalnik štohod naviedvaje sajty ź pirackim kantentam u siarednim 284 razy, što źjaŭlajecca samym vysokim pakazčykam u śviecie.
Muso zrabili vialikuju i padrabiaznuju spravazdaču, praanalizavaŭšy 23 tysiačy sajtaŭ z samym vialikim trafikam i kala 200 młn pryład u 220 krainach śvietu.
Usiaho za 2016 hod było zafiksavana kala 191 miljarda faktaŭ piractva. Kolkaść faktaŭ piractva za hod u siarednim na adnaho čałavieka pa katehoryjach vyhladaje nastupnym čynam:
Prahlad videa | 32,05 |
Torenty | 10,15 |
Veb-zapampoŭka | 8,79 |
Kradziež anłajn-patokaŭ | 2,34 |
Usiaho: | 53,33 |
Vidavočna, što najbujniejšymi spažyŭcami pirackaha kantentu źjaŭlajucca vialikija krainy, dzie ahulnaja kolkaść internet-karystalnikaŭ vysokaja:
1. ZŠA | 20,4 młrd |
2. Rasija | 14,1 młrd |
3. Indyja | 9,8 młrd |
4. Brazilija | 8,3 młrd |
5. Francyja | 8,1 młrd |
6. Turcyja | 7 młrd |
7. Vialikabrytanija | 6,9 młrd |
8. Hiermanija | 5,9 młrd |
9. Polšča | 5,5 młrd |
10. Ispanija | 4,9 młrd |
Ale kali praanalizavać kolkaść naviedvańniaŭ pirackich sajtaŭ u siarednim na adnaho internet-karystalnika za hod, rejtynh vyhladaje inakš, i Biełaruś tut zajmaje pieršaje miesca.
1. Biełaruś | 283,83 |
2. Litva | 269,08 |
3. Hruzija | 242,58 |
4. Ukraina | 236,76 |
5. Łatvija | 231,52 |
6. Rumynija | 211,48 |
7. Polšča | 197,33 |
8. Estonija | 193,16 |
9. Sinhapur | 179,38 |
10. Izrail | 176.87 |
Cikava toje, što pieršyja 8 radkoŭ zajmajuć krainy byłoha SSSR i jaho ŭschodniejeŭrapiejskija satelity. Navat tyja krainy Uschodniaj Jeŭropy, jakija stali členami Jeŭrasajuza i ŭviali bolš žorstkaje zakanadaŭstva, tak i nie pazbavilisia ad prablemy piractva. Imavierna, heta možna rastłumačyć tym, što ŭ našym rehijonie infarmacyja dahetul nie ŭsprymajecca jak tavar, za jaki treba płacić. Cikavym vyhladaje źjaŭleńnie ŭ top-10 takich vysokaraźvitych krain, jak Sinhapur i Izrail.
Akramia pryvatnaj kampanii Muso, svoj rejtynh samych «pirackich» krain składaje i Mižnarodny aljans intelektualnaj ułasnaści (IIPA). U ich rejtynh za 2016 hod Biełaruś nie patrapiła, a samaj «pirackaj» dziaržavaj była nazvanaja Ukraina. Jana razam z Kitajem, Čyli, Indyjaj, Mieksikaj, Rasijaj, Tajvaniem i Vjetnamam trapiła ŭ śpis samych «pirackich» krain.