Злодзей з курыцай у зубах збег з месца здарэння: як вілейскія міліцыянеры раскрылі злачынства
13.07.2017 / 14:59
Пра тое, што ў адной гаспадыні з Ільі (Вілейскі раён) знікла восем курыц, у міліцыю паведамілі 9 ліпеня.
— Мы яшчэ ўдакладнілі, можа, гэта звер які-небудзь курэй цягае, — распавядае намеснік начальніка вілейскага РАУС Кацярына Млечка.
Аднак міліцыянераў запэўнілі, што звер гэты на двух нагах і трэба ехаць шукаць злодзея.
Група супрацоўнікаў міліцыі прыехала ў Ілью. Працавалі паўдня: аглядалі двор, апытвалі мясцовых жыхароў. Але нічога не высветлілі.
Калі перад ад'ездам у Вілейку, эксперт пайшоў фатаграфаваць месца злачынства, усё адразу і высветлілася. З хлява выбег злачынец з апошняй, дзявятай, курыцай у зубах. Злачынцам аказалася… ліса.