Аўтобус «Гомель — Масква» трапіў у ДТЗ у Расіі: загінуў пасажыр
15.08.2017 / 12:26
Ноччу 15 жніўня аўтобус сутыкнуўся з фурай.
Прэс-служба Калужскага абласнога ўпраўлення МУС Расіі паведамляе, што ДТЗ з удзелам пасажырскага аўтобуса адбылося на 138-м км аўтадарогі Масква — Малаяраславец — Раслаўль у Калужскай вобласці.
У аўтобусе было 37 пасажыраў. У выніку ДТЗ адзін чалавек загінуў і дзевяць атрымалі траўмы. Адзін з траўмаваных — у цяжкім стане, ён у рэанімацыі.
Загінулы пасажыр жыў у Калінкавічах.
Па папярэдніх дадзеных, пасажырскі аўтобус «Неаплан», у якім ехалі беларусы, сутыкнуўся з фурай «Мэрсэдэс-Бенц» з-за трэцяга ўдзельніка руху — аўтамабіля «Фальксваген», які, не справіўшыся з кіраваннем, выехаў на паласу сустрэчнага руху і скаціўся ў кювет, чым справакаваў ДТЗ.