Суд у ЗША прызнаў неканстытуцыйнай рэформу аховы здароўя Абамы
15.12.2018 / 09:05
White House
Федэральны суддзя Рыд О'Конар у горадзе Форт-Уэрт, штат Тэхас, прызнаў неканстытуцыйным Закон аб абароне пацыентаў і даступным ахове здароўя (Patient Protection and Affordable Care Act), больш вядомы, як «Абамакер», паведамляе The Wall Street Journal. Гэты закон дэмакратамі падаваўся як галоўнае дасягненне адміністрацыі Барака Абамы, а абяцанне яго адмяніць было адным з галоўных пунктаў перадвыбарнай праграмы Дональда Трампа.
З пазовам звярнуліся ўрады 20 штатаў з рэспубліканскай большасцю, якія сцвярджалі, што адмена штрафу за адсутнасць медыцынскай страхоўкі пазбавіла сэнсу ўвесь закон. Прадстаўнікі 16 штатаў, дзе кіруюць дэмакраты, аспрэчвалі гэтае палажэннне і паабяцалі аспрэчыць рашэнне О'Конара, у тым ліку ў Вярхоўным судзе.
Прэзідэнт ЗША Дональд Трамп назваў вердыкт «выдатнай навіной для Амерыкі». «Вау, але нядзіўна, што «Абамакер» быў прызнаны неканстытуцыйным», - напісаў ён у Twitter.