Ukrainskija pamiežniki abvierhli słovy Łukašenki pra niaspynny patok zbroi z Ukrainy
Adkryvajučy siońnia ŭ Minsku kanfierencyju pa baraćbie z teraryzmam, Alaksandr Łukašenka pryznaŭsia, što z pačatkam kanfliktu va Ukrainie ŭ Biełarusi «vymušany byli sa svaimi bratami, blizkimi ludźmi [ukraincami — NN] całkam zakryć miažu, nahłucha» praz niaspynny patok zbroi, jakuju jak byccam sprabujuć pravieźci ŭ Biełaruś.
03.09.2019 / 17:37
Na zajavy Łukašenki adkazali ŭkrainskija pamiežniki: jany kanstatujuć značnaje źnižeńnie ŭzroŭniu niezakonnaha trafiku zbroi praz miažu krainy z Respublikaj Biełaruś, čym abviarhajuć zajavy Minska ab nibyta vialikaj kolkaści zbroi, jakaja niezakonna ŭvozicca ŭ krainu praz miažu z Ukrainaj. Pra heta piša partał zn.ua.
«Na praciahu apošnich hadoŭ my nieadnarazova čuli z biełaruskaha boku zajavy pra patok nielehalnaj zbroi, jaki nibyta idzie z Ukrainy. Pry hetym ukrainski bok ni razu nie atrymaŭ hetamu pacvierdžańnia», — skazaŭ pradstaŭnik Dziaržpahransłužby Ukrainy Andrej Dziemčanka.
Pavodle jaho słoŭ, za vosiem miesiacaŭ 2019 hoda na miažy z Biełarussiu ŭkrainskija pamiežniki vyjavili 38 adzinak zbroi.
«Hetaja ličba ŭ razy mienšaja, čym za anałahičny pieryjad minułaha hoda. Nieabchodna adznačyć, što z hetych 38 adzinak 20 mienavita nakiroŭvalisia na ŭjezd va Ukrainu, h.zn. ich sprabavali pravieźci mienavita z terytoryi Biełarusi», — adznačyŭ pradstaŭnik ŭkrainskaha pahranviedamstva.
Pavodle jaho słoŭ, astatnija 18 adzinak zbroi, jakija sprabavali vyvieźci na terytoryju Biełarusi z Ukrainy, tolki adna adzinka zjaŭlajecca ahniastrelnaj zbrojaj, astatnija ž — palaŭničaj, hazavaj, chałodnaj abo pnieŭmatyčnaj.