Piać sieryjałaŭ, jakija varta pahladzieć u sakaviku
08.03.2020 / 11:27
Najlepšyja šmatsieryjnyja stužki, jakija možna ŭbačyć u pieršy miesiac viasny. U našym śpisie buduć jak premjery, tak i sieryjały, jakija viartajucca ŭ efir paśla pierapynku.
«Śviet Dzikaha Zachadu» (Westworld)
Fantastyka, viestern. ZŠA, 3-i siezon
U budučyni dla bahatych ludziej buduć stvaracca admysłovyja parki zabaŭ, ale jany nie buduć padobnymi da Dysnejłendaŭ — heta budzie śviet, poŭny žorstkaści i hvałtu. Miljaniery zmohuć tam zabivać, i im za heta ničoha nie budzie, hvałtavać pryhožych dziaŭčat — i za heta taksama ničoha nie budzie. Paŭstavać u samaj nizaści čałaviečaha isnavańnia, vypuskać svaju ahresiju i seksualnuju napruhu. Dekaracyjami hetaha parku zabavaŭ staŭ Dziki Zachad kanca XIX stahodździa. Kožny budzie mieć mahčymaść adčuć siabie ŭ roli śmiełaha kaŭboja.
Fiškaj hetaha parku źjaŭlajecca toje, što jahonyja nasielniki — heta zvyčajnyja robaty ŭ čałaviečaj abałoncy. Pa idei, u ich nie pavinna zastavacca ni ŭspaminaŭ, ni pačućciaŭ, ale pastupova ŭsio heta mianiajecca. I robaty paŭstajuć suprać ekspłuatacyi, bahaciei ž prosta traplajuć u pastku.
Film, stvorany Džonatanam Nołanam («Interstełar», «Ciomny rycar») i jahonaj žonkaj Lizaj Džoj, uraziŭ usich ad pieršaha siezona svajoj nieliniejnaściu, fiłasofskaściu i šmatlikimi płastami. U sieryjale bahata cytatnaści, spasyłak na šmatlikija suśvietnyja litaraturnyja, mastackija šedeŭry. Heta nie toj sieryjał, jaki vy budziecie hladzieć dziela stralałak, tut daviadziecca dumać i dumać niamała.
«Ozark» (Ozark)
Kryminalnaja drama. ZŠA, 3-i siezon
Finansavy kansultant Marci Biord, u jakoha «dastatkova sumnaje žyćcio», zahraznuŭ u pazykach i hulniach z narkamafijaj. Jon nie znachodzić lepšaha vyjścia, jak uciačy z Čykaha ŭ maleńki haradok Ozark, štat Misury, kab uratavać svajo žyćcio, a taksama žyćcio svajoj siamji.
U sieryjale možna znajści dastatkova kłasičny kaktejl dla kryminalnaj dramy: mieksikanskija narkahandlary, hrošy, prastytutki, pistalety. Plus «Ozarka» — u daskanałych dekaracyjach, pradumanych dyjałohach hałoŭnych hierojaŭ, u jaho psichałahiźmie. Mnohija schilnyja paraŭnoŭvać «Ozark» z «Va ŭsie ciažkija», ale heta nie historyja maralnaha padzieńnia kankretnaha čałavieka, heta historyja pra čałavieka, jaki ŭvieś čas bałansuje na miažy, i dla taho, kab vyžyć, vymušany prydumlać i pieraŭtvarać u žyćcio samaje nievierahodnyja idei.
«Karaleŭstva» (Kingdom)
Bajavik, žachi. 2-i siezon. Paŭdniovaja Kareja, ZŠA
Jak pryciahnuć uvahu da historyi svajoj krainy ŭ naš čas? Možna pasprabavać praz zombi. «Karaleŭstva» — heta dzivosny kaktejl realnych histaryčnych padziej, što adbyvalisia ŭ siaredniaviečnaj Karei, razbaŭleny zombi-apakalipsisam. Film nastolki dobra razyšoŭsia na radzimie, što jaho z radaściu kupiŭ Netflix.
Čason (tak u XVI stahodździ nazyvałasia Kareja) razrabavany i spustošany paśla vajny ź Japonijaj, asabliva dastałasia paŭdniovym rehijonam krainy. U karaleŭskaj siamji taksama ŭsio nie duža dobra, stary vaładar pamiraje, a jahonyja spadkajemcy nie mohuć padzialić uładu. U pryncypie, usio dastakova prościeńka i zusim nie ciahnie ŭ palityčnym sensie na «Hulniu tronaŭ», ale ŭ spravu ŭmiešvajucca zombi.
Zrabić film z zombi i nie skacicca ŭ adkryty treš — heta niaprostaja zadača dla luboha režysiora. U karejcaŭ atrymałasia heta zrabić u pieršym siezonie.
«Zmova suprać Amieryki» (The Plot Against America)
Drama, alternatyŭnaja historyja. ZŠA, 1-y siezon
Čarlz Lindbierh — heta realny histaryčny piersanaž, viadomy amierykanski lotčyk, jaki pieršym ździejśniŭ samastojny pieralot praz Atłantyčny akijan. Čałaviek z nadzvyčaj cikavym losam, jon udzielničaŭ u raspracoŭcy štučnaha serca, jahonaha syna vykrali i zabili, a ŭ 30-ja Lindbierh vadziŭ siabroŭstva z nacystami ŭ ZŠA i Hiermanii, navat atrymaŭ ad Hierynha orden Hiermanskaha arła. Kali pačałasia Druhaja suśvietnaja vajna, to Lindbierh zaklikaŭ da taho, kab Amieryka nie ŭciahvałasia ŭ hety kanflikt pad upłyvam jaŭrejaŭ, šmat krytykavaŭ Franklina Ruźvielta.
«Zmova suprać Amieryki» — heta čarhovaja alternatyŭnaja historyja, dzie prapanoŭvajecca varyjacyja na temu: što było b, kab u 1940 hodzie Čarlz Lindbierh staŭ prezidentam ZŠA. Pad jaho kiraŭnictvam kraina dastatkova ŭpeŭniena spaŭzaje ŭ nacysckuju dyktaturu. Sieryjał źniaty pavodle ramana vialikaha amierykanskaha piśmieńnika Filipa Rota (jahonymi baćkami byli jaŭrei z Ukrainy).
«Dzivosnyja historyi» (Amazing Stories)
Fantastyka, drama. ZŠA, 1-y siezon
Hety sieryjał biare pačatak jašče ŭ 1985 hodzie. Užo viadomy na toj čas pa «Skivicach», «Indyjanie Džonsu» i «Inšapłanietniku» režysior Styvien Śpiłbierh biarecca za sieryjał. Heta nijak nie źviazanyja pamiž saboj historyi ludziej, ź jakimi adbyvajucca nievierahodnyja rečy. Naprykład, aficyjantcy Łois na dziesiacihodździe šlubu muž doryć piarścionak, jaki skraŭ u muziei vaskovych fihur. Łois ciapier zaŭsiody choča seksu, ale adnojčy jana nakidvajecca na muža z nažom u sprobie zabić jaho. Akazvajecca, što piarścionak naležyŭ Čornaj Udavie, jakaja zabiła troch svaich mužoŭ.
Film byŭ dobra sustrety krytykami (piać uznaharod «Emi»), a voś hledačy nie duža kaciravali «Dzivosnyja historyi». U vyniku paśla dvuch siezonaŭ sieryjał zakryli. I choć raniej Śpiłbierh nieadnarazova skieptyčna vykazvaŭsia pra sieryjały, jakija robiacca dla anłajn-płatformaŭ, usio ž vyrašyŭ pasprabavać dać novaje žyćcio svajmu daŭniamu prajektu.
Hladzi taksama: