«Siłavikam nas vydała miascovaja babula». Eks-režysiorka BT pra noč z maci ŭ izalatary
26.10.2020 / 17:53
Eks-viadučuju «Biełteleradyjokampanii» Natallu Bibikavu razam ź jaje dačkoj Alaksandraj Babkovaj, eks-režysiorkaj telekanała «Biełaruś-3», siońnia ŭ abied vypuścili z Žodzina. Ich zatrymali razam na niadzielnym maršy 25 kastryčnika.
Alaksandra raskazała «Našaj Nivie», što razam z usimi pratestoŭcami ich kampanija, jakaja składałasia ź jaje, muzyki Eryka Arłova-Šymkusa i ich mam, sprabavała schavacca ŭ damach na Arłoŭcy, kali ŭ demanstrantaŭ palacieli śviatłošumavyja hranaty.
— My zabiehli ŭ adzin z padjezdaŭ, jaki znachodzicca pobač z RNPC «Maci i dzicia». Tudy nas puściŭ miascovy chłopiec, navat paśla vynosiŭ nam vadu. Ahułam tam chavałasia čałaviek 25. U asnoŭnym — dziaŭčaty. Chutka dadomu viarnulisia niejkija babula i dziadula, jany byli niezadavolenyja, što my ŭ ich siadzim. Hruba skazali sychodzić. U vyniku babula paklikała siłavikoŭ i vydała im nas: «Voś, tut chavajucca».
Saša padčas zabastovak na «Biełteleradyjokampanii» ŭ žniŭni, adkul jana zvolniłasia paśla vybaraŭ. Fota Nadziei Bužan
Zabrali z padjezda amal usich: chłopcaŭ i žančyn razvozili asobna. Pašancavała tolki tym, chto ŭ momant zatrymańnia paprasiŭsia da žycharoŭ u prybiralniu.
— U ich liku była maci Eryka. Pry hetym siłaviki sprabavali łamacca ŭ tuju kvateru, ale nie atrymałasia, — zhadvaje Saša.
U Saviecki RAUS dziaŭčynu pavieźli razam z maci, paśla jany zaŭsiody znachodzilisia pobač.
— U RAUS my prosta stajali hadzin 5-6, paśla nam dazvolili sieści. I navat dali vady, puścili ŭ prybiralniu. U Žodzina pavieźli pozna nočču, hadzinie a druhoj. U kamiery na 4 čałavieki nas akazałasia 10, biez matracaŭ i jakoj-kolviečy paścieli. Vałanciory patłumačyli, što heta, vierahodna, kab nie parycca z nami dziela adnoj nočy.
Natalla Bibikava z Sašaj, mužam i małodšym synam
U vyniku sudovaha pasiadžeńnia spravu Natalli adpravili na dapracoŭku — u listapadzie budzie novy sud. Alaksandra pahadziłasia z pratakołam, tamu atrymała štraf u 7 bazavych vieličyń.
Muzyka Eryk Arłoŭ-Šymkus ciapier znachodzicca na Akreścina.
— Budu siońnia sprabavać pieradać jamu leki ad cisku, — kaža Saša. — Jaho zaplečnik pry zatrymańni zastaŭsia ŭ mianie, na žal. Ja radaja, što dla nas z maci ŭsio tak skončyłasia, ale vydychnuć z palohkaj pakul nie atrymajecca.