Što adbyvajecca na «Hrodna Azocie» ŭ druhi dzień strajku
27.10.2020 / 19:34
Častka azotaŭcaŭ dałučyłasia da strajku 27 kastryčnika. Prynamsi adnaho strajkoŭca zatrymali, piša Svaboda.
Asnoŭnym miescam strajku zastajucca dva bujnyja, źviazanyja pamiž saboj cechi — «Amijak-3» i «Karbamid-4». Jany prynosiać «Azotu» značny prybytak. Pa słovach adnaho z rabotnikaŭ, tolki «Amijak-3» zarablaje minimum 1 miljon eŭra ŭ miesiac. Da taho ž strajkujuć rabotniki cechaŭ AKiKAS (azotnaj kisłaty i karbamidna-amijačnaj sumiesi) i cyklahieksanonu.
Jašče para źviazanych pamiž saboj bujnych cechaŭ nie strajkuje: «Amijak-4» i «Karbamid-3».
Dakładnaja kolkaść strajkoŭcaŭ nieviadomaja. Rabotniki paviedamlajuć pra bolš jak sotniu na ŭsim zavodzie. Lider strajkamu «Azotu» Jury Ravavy źbiraje zajavy ad supracoŭnikaŭ.
Na «Hrodna Azocie» pracuje bolš za 7 tysiač čałaviek — biez uliku pradpryjemstva «Chimvałakno», jakoje ciapier uvachodzić u skład chimičnaha hihanta.
Rankam 27 kastryčnika kala prachadnoj «Azotu» sabralisia paŭsotni čałaviek, kab padtrymać tych, chto choča dałučycca da strajku. Treciaja źmiena z pačatku strajku cechu «Amijak-3» admaŭlałasia prystupać da pracy. Adnak potym niekalki čałaviek pahadzilisia, reštu rabotnikaŭ na źmienu znajšli siarod načalstva i inšych azotaŭcaŭ.
Usiaho ŭ «Amijaku-3» pracujuć čatyry źmieny, kožnaja pa 12 hadzin. Pierad hetym dźvie ŭžo admovilisia vykonvać svaje abaviazki. Ź viečara 25 kastryčnika adny i tyja ž ludzi pracavali 36 hadzin zapar.
Pad pytańniem zastajecca načnaja źmiena, jakaja maje zastupić a 20-j hadzinie 27 kastryčnika. Pakul niedachop ludziej. Viadoma, što kiraŭnictva abzvońvaje pensijaneraŭ i byłych rabotnikaŭ z prapanovaj vyjści na pracu.
Da taho ž načalstva abviaściła pra pošuk kadraŭ u cech «Amijak-3», niekalki azotaŭcaŭ ź inšych padraździaleńniaŭ užo vykazali žadańnie pierajści tudy. Padrychtoŭka technalahičnaha persanału dla «Azotu» zajmaje kala paŭhoda.
Ciaham dnia rabotniki nie źbiralisia na prachadnoj, jak napiaredadni. Zranku niekatorych ludziej zaprasili «na hutarki» sa słužbaj biaśpieki, prapanoŭvali napisać zajavy na zvalnieńnie pa zhodzie bakoŭ. Azotaŭcy admovilisia. Paśla hetaha rešta strajkoŭcaŭ razyšłasia pa damach.
Niekatorym azotaŭcam zranku zablakavali elektronnyja propuski, ciapier jany nia mohuć trapić na zavod, jak zvyčajna, praz prachadnuju.
Strajkoŭcy raźličvajuć, što bolšaść kalehaŭ nia buduć pierajmać źmieny. Adny i tyja ž ludzi, jakija nie strajkujuć, fizyčna nia zmohuć pracavać non-stop. Tady kiraŭnictva vymušana addaść zahad pačać spynieńnie vytvorčaści.
Rabotniki kažuć, što kali jany biez dazvołu načalstva spyniać pracu cechaŭ, to mohuć panieści kryminalnuju adkaznaść, bo na «Azocie» idzie składany technalahičny praces. Pamyłka pry spynieńni moža pryvieści da technalahičnaj katastrofy. Sa słovaŭ «azotaŭcaŭ», vybuch na vytvorčaści vyniščyć terytoryju ŭ radyjusie 40 kilametraŭ.
Rankam źnik supracoŭnik «Amijaku-3» Alaksandar Žuk. Jon uvachodzić u radu Biełaruskaha niezaležnaha prafsajuzu ad svajho cechu. Apošni raz Žuk vyjšaŭ na suviaź u 6:22, z kalehami jon tak i nie sustreŭsia. Jak daviedalisia azotaŭcy, Žuka zabrali na razmovu ŭ KDB. Uviečary jon pazvaniŭ žoncy. Jahony dalejšy los nieviadomy. Da taho ž, nieviadomyja sprabavali trapić u kvateru da rabotnika cechu cyklahieksanonu Dzianisa Sajko, adnak potym syšli, kali padtrymać Sajko pryjšli inšyja haradziency.
Pavodle aficyjnaj infarmacyi pradpryjemstva «Hrodna Azot», rankam 26 kastryčnika adbyłasia sproba destabilizavać abstanoŭku. Kala prachadnoj zavodu sabrałasia bolš za 100 čałaviek, bolšaść ź jakich nie pracujuć na «Azocie». Pavodle aficyjnaha paviedamleńnia, pravakacyjnyja dziejańni lakalizavali, zabastoŭki na pradpryjemstvie niama.
Pradstaŭnik kancernu «Biełnaftachim» zajaviŭ 27 kastryčnika, što AAT «Hrodna Azot» pracuje ŭ štatnym režymie, usie technalahičnyja pracesy ŭ normie. Infarmacyju ŭ Telegram-kanałach ab prypynieńni piečaŭ na pradpryjemstvie ŭ kancernie nazvali pravakacyjaj.
Rankam 26 kastryčnika na prachadnoj «Hrodna Azot» sabrałasia kala 100—150 azotaŭcaŭ i inšych haradziencaŭ. Tudy pryjechali aŭtobusy i žorstka zatrymali častku ludziej. Pa śviedčańniach azotaŭcaŭ, ich bili, abražali, stavili na kaleni. Pa roznych acenkach, u RAUS akazalisia ad 32 (aficyjnaja versija milicyi) da 100 čałaviek. Potym usich adpuścili i zavieźli na pracu. Paśla zatrymańniaŭ niechta ŭźniaŭ nad zavodam bieł-čyrvona-bieły ściah. Kala 35 strajkoŭcaŭ ciaham dnia zastavalisia na prachadnoj i nie išli na svaje pracoŭnyja miescy. Uviečary jany pajšli dadomu.