За надпіс «Не забудзем» на Пушкінскай двух чалавек абвінавачваюць па «крыміналках». Ім пагражае да 10 гадоў

28.10.2020 / 09:49

У верасні дваіх мінчукоў затрымалі пасля таго, як яны спрабавалі аднавіць мемарыял Аляксандру Тарайкоўскаму — надпіс на асфальце «Не забудзем». Цяпер людзям выстаўляюць па два артыкулы крымінальнага кодэкса, за якія ім пагражае пакаранне да 10 гадоў, піша Tut.by.

Нагадаем, 25-гадовая мінчанка Марыя Бабовіч 9 верасня пісала грунтоўкай на асфальце каля станцыі метро «Пушкінская» дзве літары з фразы «Не забудзем».

Тады дзяўчыну затрымалі па 339-м артыкуле КК РБ за хуліганства. Праз некалькі дзён Марыю выпусцілі, але пазней зноў выклікалі ў міліцыю для паказанняў, у пастанове яна ўбачыла іншы артыкул КК РБ-341 (апаганьванне збудаванняў і псаванне маёмасці) КК РБ. Тады дзяўчына заставалася на волі.

У пастанове было пазначана, што «псаванне маёмасці» нанесла матэрыяльную шкоду «Гаррамаўтадору Мінгарвыканкама» на агульную суму 10 182 рублі 52 капейкі (больш 377 базавых велічынь).

Адвакат Марыі Андрэй Мачалаў паведаміў: цяпер Марыя пад вартай у СІЗА ў Жодзіна. Артыкул паводле яе справы перакваліфікавалі. Цяпер дзяўчыну абвінавачваюць па двух артыкулах Крымінальнага кодэкса РБ — па ч. 2 арт. 339 і ч. 2 арт. 218.

Суда да гэтага моманту не было, калі ён пройдзе — невядома. Падрабязнасці следства адвакат Мачалаў распавядаць адмовіўся.

Праз надпіс затрымалі і 42-гадовага мінчука Дзяніса Граханава, ягоная мама распавяла, што 9 верасня ўвечары ён быў адным з тых, хто аднаўляў надпіс на мемарыяле.

— Ён быў адзін, потым да яго падышлі два хлопцы, якія проста глядзелі. Калі на Пушкінскую прыехалі сілавікі, сын адтуль з'ехаў на ровары. А 10 верасня прыйшлі дадому і забралі — вылічылі па камерах. Суткі ён правёў у РУУС, потым на Акрэсціна. 13 верасня яго выпусцілі. Сказалі чакаць суда. 22 кастрычніка прыйшлі і сказалі прайсці на размову са следчым — і ўсё, з канцамі. Спачатку следчы сказаў, што яго павінны перавесці ў Жодзіна з Акрэсціна, але цяпер наогул невядома — дзе ён, — распавядае ягоная мама Дзіна.

Па словах мамы, артыкул у гэты раз «абцяжарылі», а выстаўлены ўрон «Гаррамаўтадару», які да гэтага складаў 7 тысяч 500 рублёў, павялічылі да 10 тысяч.

У верасні Дзяніса затрымлівалі па 341 артыкуле КК РБ( апаганьванне збудаванняў і псаванне маёмасці), а цяпер справу перакваліфікавалі па такіх жа двух артыкулах, як і ў Марыі Бабовіч — ч. 2 арт. Ён пад вартай.

Блізкім Дзяніса вядома, што ён не згаджаўся з абвінавачваннем і лічыў, што складу злачынства ў яго ўчынках няма, мужчына збіраўся хадайнічаць аб спыненні крымінальнай справы.