Łatuška: Śledam za aliharcham pad sankcyi trapić jaho biznes. Moža, i partniory, i banki, što ź im supracoŭničajuć
«Prysudžeńnie dvuch z pałovaj hadoŭ za nadpis «Nie zabudziem» nie paddajecca nijakamu apisańniu, datyčnyja da biespadstaŭnych sudovych vyrakaŭ buduć za ich adkazvać», — kaža Pavieł Łatuška i dadaje, što mienavita takija vypadki i ich masavaść pravakujuć uviadzieńnie novych sankcyj u dačynieńni da Biełarusi. Sankcyi i adkaznaść za złačynstvy — dva hałoŭnyja prajekty na «pracoŭnym stale» palityka siońnia. Padrabiaźniej pra heta jon raskazaŭ «Našaj Nivie».
09.12.2020 / 18:03
Fota Nadziei Bužan.
Pavodle Paŭła Łatuški, siońniašnija padziei vyklikajuć dva maštabnyja źniešniepalityčnyja pytańni: pa-pieršaje, ci «zdaść ekzamien Rasija», jakaja zaŭsiody dekłaravała, što biełarusy dla jaje — braterski narod, ale vybrała padtrymku režymu Łukašenki, i ci maje jeŭrapiejskaja demakratyja miechanizmy ŭpłyvu, kali ŭ adnoj ź jeŭrapiejskich krain masava parušajucca pravy čałavieka i ździajśniaiucca represii.
Adzin z takich instrumientaŭ cisku — sankcyi — ciapier z’iaŭlajecca asnoŭnym kirunkam dziejnaści Narodnaha antykryzisnaha ŭpraŭleńnia pad kiraŭnictvam Łatuški. «I ŭ Śviatłany Cichanoŭskaj, i ŭ nas, i ŭ mianie asabista było na hety kont šmat sustreč i dahetul jany adbyvajucca ledź nie kožny dzień. My viedajem, Jeŭrapiejski Sajuz pryniaŭ rehłamient pa sankcyjach — pad dzieviać z dvanaccaci jaho punktaŭ padpadaje režym Łukašenki.
Dziakujučy sankcyjam budzie stvorana sistema, pry jakoj śledam za aliharcham, što finansuje režym, u śpis adrazu trapiać i jaho biznes, i, mahčyma, jaho partniory, i bankaŭskija struktury, što ź im supracoŭničajuć. Takim čynam nivodnaja bankaŭskaja struktura Jeŭrapiejskaha Sajuza, a faktyčna z usiaho śvietu — nie zmoža dapamahčy jamu finansava, bo ŭ takim vypadku budzie ryzykavać spahnańniami z boku jeŭrapiejskich instytutaŭ».
Jak kaža Pavieł, pakolki zvyčajna biznes zaviazany na pastaŭkach i finansavych kamunikacyjach z usim śvietam, trapleńnie ŭ sankcyjny śpis moža hety biznes likvidavać albo, prynamsi, značna abmiežavać. Aproč taho, što sami sankcyi stanuć bolš sur’ioznymi, budzie sproščana pracedura, pa jakoj pad abmiežavańni buduć traplać dadatkovyja asoby albo kampanii. Ciapier čakajecca pašyreńnie śpisu, a nastupnym etapam mohuć być siektaralnyja sankcyi.
Pavieł Łatuška nastojvaje na tym, što adkaznaść za heta niasuć asoby, jakija štodnia ŭ Biełarusi ździajśniaiuć złačynstvy. «My ž razumiejem, što, kali b Łukašenka syšoŭ, uvodzić sankcyi było b nie treba».
Z dziejańniami ŭłady źviazany druhi prajekt — adzinaja kniha rehistracyi złačynstvaŭ.
«My supolna pracavali nad im dva miesiacy, u knizie mohuć rehistravacca pieradusim tyja, u adnosinach da kaho byli ździejśnieny złačynstvy. Taksama śviedki: kali vy majecie dokazy katavańniaŭ, źbićcia ludziej albo falsifikacyj vynikaŭ hałasavańnia na vašym vybarčym učastku, možacie dać hetuju infarmacyju ŭ knizie. Narešcie, sami adkaznyja za złačynstvy mohuć ździejśnić jaŭku z pryznańniem viny. Chutka my damo prykłady taho, jak śviedka moža dapamahčy zafiksavać złačynstva».
Sistema knihi dazvalaje vybudavać schiemy z tych, chto addavaŭ zahady, i tych, chto ich vykonvaŭ, praz što ŭzrovień ciažkaści złačynstva ŭzrastaje. «Kali heta nie asobnaje, a sistemnaje dziejańnie, havorka idzie pra arhanizavanuju złačynnuju hrupoŭku, pryčym dziakujučy knizie my budziem viedać, chto stajaŭ ci staić na jaje čale».
Pavieł Łatuška ličyć, što my nazirajem za histaryčnym momantam z Biełarussiu ŭ jaho centry, i ŭ zaležnaści ad taho, jak buduć vyrašany zhadanyja pytańni, naša kraina moža adyhrać hałoŭnuju rolu ŭ tym, kab naładzić parazumieńnie pamiž Zachadam i Uschodam. «Biełarusy siońnia zmahajucca za svaje pravy i svabody, ale, mahčyma, taksama za niešta bolšaje, važnaje nie tolki dla biełarusaŭ».