«Režymnyja pacuki» i «Pacučynaje słova». U Rahačovie haradžanie pakinuli «pasłańni» žurnalistam rajonnaj haziety

U Rahačovie na budynku redakcyi «Svabodnaha słova» znoŭ źjavilisia nadpisy, adrasavanyja žurnalistam haziety.

28.01.2021 / 16:45

Vydańnie tłumačyć, što kali raniej nadpisy byli «adnatypnyja» z astatnimi pa horadzie, to ciapier jany datyčacca niepasredna «Svabodnaha słova». Tak žurnalisty praŭładnaj haziety rascanili frazy «Režymnyja pacuki» i «Pacučynaje słova», jakija źjavilisia niekalki dzion tamu.

Redakcyja źviarnułasia ŭ miascovy RAUS i paprasiła adšukać aŭtaraŭ nadpisaŭ.

«Takija podłyja vychadki, ciškom, čarhovy raz dakazvajuć, nakolki biezdapamožnyja hetyja samyja «mirnyja» i «nievierahodnyja». Jany tolki i zdolnyja pa načach biehać pa horadzie i rabić hadaści. A napadki na «Svabodnaje słova» kažuć pra mnohaje. Rajonnaja hazieta dla ich jak kostka ŭ horle: žurnalisty hramiać ich fejki daščentu i pakazvajuć rahačoŭcam realnuju karcinu taho, što adbyvajecca. Voś heta hora-zmaharam i nie padabajecca», — paviedamlaje vydańnie.