Найбуйнейшыя ЦЭЦ Украіны запатрабавалі забараніць імпарт электраэнергіі з Расіі і Беларусі
Вытворцы цяпла і электраэнергіі таксама просяць урад паўплываць на адмену цэнавых абмежаванняў на рынку. Найбуйнейшыя цеплаэлектрацэнтралі Украіны запатрабавалі ад урада краіны забараніць імпарт электраэнергіі з Расіі і Беларусі і адмяніць цэнавыя абмежаванні тарыфаў.
15.02.2021 / 14:10
Пра гэта гаворыцца ў распаўсюджаным у панядзелак адкрытым лісце Украінскай энергетычнай асацыяцыі на імя прэм'ер-міністра Украіны Дзяніса Шмыгаля, піша ТАСС.
«Просім неадкладна прыняць рашэнне <…>. Спыніць імпарт электрычнай энергіі для прыватных кампаній у рамках Аб'яднанай энергасістэмы Украіны», — гаворыцца ў дакуменце.
Узрослы імпарт, падкрэсліваюць у асацыяцыі, стварае страты для ўкраінскіх вытворцаў, бо «прыводзіць да абвалу індыкатыўнай цэны электрычнай энергіі да 1200 грыўняў за МВт/г (каля $43). «З 11 лютага 2021 года аб'ём імпарту вырас да 1 800 МВт г», — гаворыцца ў паведамленні.