U Połacku zatrymali studentku PDU — jaje padazrajuć u abrazie pradstaŭnika ŭłady
U Połacku 26 sakavika zatrymali 21-hadovuju studentku humanitarnaha fakulteta PDU Alaksandru Buku. Dziaŭčynu padazrajuć u abrazie pradstaŭnika ŭłady (artykuł 368 KK). Jana znachodzicca ŭ IČU. Pra heta Tut.by paviedamiła maci ctudentki Jułija Buka.
27.03.2021 / 10:38
Fota «Radyjo Racyja»
— Učora Alesia — tak my nazyvajem Alaksandru doma — viarnułasia ŭ internat z zaniatkaŭ va ŭniviersitecie. Da jaje ŭ pakoj pryjšli ź pieratrusam. Jana paśpieła mnie pra heta paviedamić pa telefonie. Ad jaje siabroŭ ja daviedałasia, što pry pieratrusie ŭ dački kanfiskavali techniku, mahčyma, niešta jašče. Paźniej udałosia vyśvietlić, što Alesia zatrymanaja da 72 hadzin pa padazreńni ŭ ździajśnieńni złačynstva pa artykule 369 KK (Abraza pradstaŭnika ŭłady). Jana znachodzicca ŭ IČU, — raspaviała Jułija Buka.
U dziaŭčyny jość advakat, joj, pa słovach maci, u subotu abiacali dazvolić pieradać pieradaču.
Alaksandra vučycca na 4 kursie humanitarnaha fakulteta Połackaha dziaržuniviersiteta, na śpiecyjalnaści «ramana-hiermanskaja fiłałohija».
Fota sa staronki Alesi ŭ fejsbuku
Dziaŭčyna maje aktyŭnuju hramadzianskuju pazicyju. U kastryčniku jana razam ź inšymi studentami PDU ŭdzielničała ŭ videazvarocie suprać biezzakońnia i hvałtu ŭ Biełarusi paśla vybaraŭ. Nieŭzabavie ŭsich dziejnych asob hetaha rolika vyklikali na razmovu da prakurora Navapołacka Anatola Aŭsiuka.
U sakaviku Alaksandra Buka i jašče troje studentaŭ PDU ŭdzielničali ŭ fłešmobie, pryśviečanym palitviaźniam: u znak salidarnaści ź imi maładyja ludzi pahalili hałavu. Paśla hetaha ŭ VNU pryjšła staršaja pamočnica prakurora Navapołacka Kaciaryna Jaroma.
Maci Alaksandry — Jułija Buka — pradprymalnica, haspadynia ahrasiadziby «Rodny kut» u vioscy Vałodźkava Hłybockaha rajona. Žančyna razmaŭlaje na biełaruskaj movie, biełaruskamoŭnym turystam na jaje siadzibie pradastaŭlajucca źnižki. Luboŭ da nacyjanalnaj kultury, historyi, movy Jułija pieradała i svaim traim dzieciam. Alaksandra — małodšaja ź ich.