U dačynieńni da nastaŭnika Śvisłackaj škoły raspačali kryminalnuju spravu za paklop na Łukašenku
Prakuratura Hrodzienskaj vobłaści 24 sakavika raspačała kryminalnuju spravu ŭ dačynieńni da nastaŭnika siaredniaj škoły ŭ Śvisłačy za paklop u dačynieńni da prezidenta. 56-hadovy miascovy žychar, na dumku prakuratury, 20 žniŭnia na centralnaj płoščy vykazvaŭ na płoščy «iłžyvyja i biazdokaznyja asabistyja vydumki», paviedamlaje Tut.by sa spasyłkaj na Hienprakuraturu.
31.03.2021 / 13:16
Mitynh u Śvisłačy 20 žniŭnia 2020 hoda. Fota: vk.com/svisloch_city
20 žniŭnia na płoščy Karła Marksa ŭ Śvisłačy prachodziŭ mirny mitynh. Tady ŭ centry nasielenaha punkta sabrałasia kala 50 čałaviek. Ludzi źbirali podpisy, kab u miascovaj rajoncy byli apublikavanyja pratakoły ŭsich vybarčych kamisij, a taksama chacieli sustrecca sa staršynioj Śvisłackaha rajvykankama.
Padčas mitynhu niekatoryja vystupali pierad prysutnymi.
Pavodle viersii prakuratury, 56-hadovy nastaŭnik miascovaj škoły «naŭmysna vykazaŭ biazdokaznyja, zahadzia iłžyvyja, haniebnyja dla kiraŭnika dziaržavy asabistyja vydumki, złučanyja ź jaho abvinavačvańniem u asabliva ciažkim złačynstvie».
Raspačataja kryminalnaja sprava pavodle č. 2 art. 367 KK — za paklop u dačynieńni da prezidenta.
Pakarańnie — abmiežavańnie voli na termin da piaci hadoŭ abo pazbaŭleńniem voli na toj ža termin.