Войскі ЗША прыведзеныя ў поўную боегатоўнасць з-за сцягвання расійскіх сіл да межаў Украіны
Еўрапейскае камандаванне амерыканскай арміі ў адказ на разгортванне дадатковых расійскіх войскаў павысіла ўзровень назірання з «магчымага крызісу» да «патэнцыйнага немінучага крызісу».
01.04.2021 / 23:42
Еўрапейскае камандаванне ўзброеных сіл ЗША прывяло войскі ў баявую гатоўнасць самага высокага ўзроўню пасля таго, як акупанты на Данбасе парушылі рэжым спынення агню і забілі чатырох украінскіх вайскоўцаў, а Расія пачала сцягваць войскі да мяжы з Украінай, паведамляе Politico.
Пентагон насцярожыла таксама тое, што Расія на гэтым тыдні актывізуе сваю дзейнасць ва Усходняй Еўропе і Арктыцы.
Адказны за абарону ЗША генерал Глен Ван Херк адзначае ўсплёск расійскай агрэсіі ў Данбасе і адзначае імкненне Масквы «аднавіць свой уплыў на сусветнай арэне».
На мінулым тыдні Еўрапейскае камандаванне амерыканскай арміі ў адказ на разгортванне дадатковых расійскіх войскаў павысіла ўзровень назірання з «магчымага крызісу» да «патэнцыйнага немінучага крызісу» — самага высокага ўзроўню.
Пры гэтым некаторыя афіцыйныя асобы лічаць, што Расія ў асноўным бразгае зброяй і насамрэч не мае намеру ісці ў наступ. Іншыя, наадварот, мяркуюць, што аперацыя, нібыта праверка новага амерыканскага прэзідэнта, можа хутка перарасці ў нешта больш злавеснае.