Jeŭraparłamient zaklikaŭ adklučyć Biełaruś ad SWIFT i pieradać pravy BT «Biełsatu»
Jeŭraparłamient zaklikaje Radu JES uvieści novyja indyvidualnyja i siektaralnyja sankcyi suprać Minska. Pra heta havorycca ŭ prajekcie rezalucyi, pryśviečanaj situacyi z prymusovaj pasadkaj samalota Ryanair u Minsku, pa jakim u čacvier adbudziecca hałasavańnie, piša TASS.
10.06.2021 / 09:29
«Zaklikajem Radu JES jak maha chutčej pašyryć śpis asob i arhanizacyj, na jakija raspaŭsiudžvajucca sankcyi JES, uklučyŭšy tudy adkaznych za pierachop i prymusovuju pasadku rejsa Ryanair, a taksama za zatrymańnie Ramana Pratasieviča i Safii Sapiehi», — havorycca ŭ dakumiencie.
U im taksama idzie havorka pra nieabchodnaść terminova pryvieści ŭ vykanańnie čacviorty pakiet sankcyj, jaki ŭklučaje asob, «datyčnych da elektaralnych machinacyj i parušeńnia pravoŭ čałavieka», suddziaŭ i supracoŭnikaŭ pravaachoŭnych orhanaŭ, jakija ŭdzielničali ŭ zatrymańni i pryciahnieńni da adkaznaści apazicyjanieraŭ.
Asobna aŭtary rezalucyi zaklikali ŭvieści sankcyi suprać teležurnalista Marata Markava, jaki braŭ intervju ŭ zatrymanaha Pratasieviča.
Taksama prapanujecca ŭvieści siektaralnyja sankcyi, «jakija zakranajuć handal syroj naftaj i naftavymi praduktami, kalijnuju, staleliciejnuju i drevaapracoŭčuju pramysłovaść».
Akramia taho, aŭtary rezalucyi zaklikajuć spynić supracoŭnictva i finansavańnie biełaruskich dziaržaŭnych bankaŭ i abmiežavać kredytnyja linii mižnarodnych bankaŭ dla daččynych bankaŭ u Biełarusi, a taksama razhledzieć pytańnie ab časovym vyklučeńni Biełarusi ź sistemy SWIFT.
Da sankcyj, u tym liku zabarony na paloty dla biełaruskich avijakampanij, prapanujuć dałučycca i inšym krainam-partnioram JES.
Jeŭraparłamientaryi zajaŭlajuć ab nieabchodnaści prypynić supracoŭnictva jeŭrapiejskich kampanij, u pryvatnaści Siemens, ź biełaruskimi partniorami, a taksama pieradaču technałohij. Pry hetym jany zaklikajuć da skaardynavanych dziejańniaŭ JES pa kampiensacyi škody krainam, jakija paciarpieli ad sankcyj z boku Minska, i pieraaryjentacyi biznesu na pryvatnyja kampanii, nie źviazanyja z uładaj.
«Jeŭraparłamient surjozna zakłapočany spryjańniem Rasii režymu Łukašenki, u tym liku za košt finansavaj padtrymki i ciesnaha supracoŭnictva śpiecsłužbaŭ», — havorycca ŭ dakumiencie.
Jaho aŭtary zaklikajuć «rasśledavać rolu Rasii» ŭ incydencie z vymušanaj pasadkaj samalota Ryanair i, u vypadku vyjaŭleńnia datyčnych da hetaha naŭprost ci ŭskosna hramadzian RF, uvieści ŭ dačynieńni da ich sankcyi.
Krainy-ŭdzielnicy JES zaklikajuć abjadnać namahańni, asabliva pa častcy abmienu raźviedźviestkami, pa situacyi ŭ Biełarusi i «vysłać usich viadomych aficeraŭ biełaruskaj vyviedki» z terytoryi JES.
«Zaklikajem staršyniu abmiežavać dostup supracoŭnikaŭ ambasady Biełarusi ŭ Bruseli ŭ Jeŭraparłamient, a taksama ich fizičny i virtualny ŭdzieł u mierapryjemstvach JEP i pierahledzieć pytańni abmienu infarmacyjaj ź biełaruskaj dypmisijaj», — abviaščaje dakumient.
Jeŭradeputaty vystupili za prypynieńnie členstva Biełarusi ŭ mižnarodnych spartyŭnych arhanizacyjach i abmiežavańnie dostupu zbornaj krainy na mižnarodnyja spabornictvy, u tym liku Alimpijskija Hulni ŭ Tokia.
Taksama jany vykazalisia za pazbaŭleńnie biełaruskaha dziaržtelebačańnia pravoŭ na tranślacyju matčaŭ čempijanatu Jeŭropy pa futbole i za biazvypłatnuju pieradaču hetych pravoŭ «Biełsatu».
Rezalucyja Jeŭraparłamienta maje rekamiendacyjny charaktar.