«Jakoj mieraj mierajecie, takaja i vam admieranaja budzie». Akcior-palitviazień Vołkaŭ vystupiŭ z apošnim słovam
6 lipienia budzie vyniesieny prysud jašče dziesiaci fihurantam tak zvanaj «Pinskaj spravy». Usie jany abvinavačvajucca va ŭdziele ŭ masavych biesparadkach u Pinsku ŭ noč z 9 na 10 žniŭnia 2020 hoda. Siarod ich — zorka Paleskaha dramatyčnaha teatra Siarhiej Vołkaŭ, jakoha, siarod inšaha, abvinavačvajuć u tym, što jon naŭmysna kinuŭ u bok milicyjanieraŭ zapalničku: mužčyna svajoj viny nie pryznaŭ.
05.07.2021 / 23:51
Napiaredadni abviaščeńnia prysudu z «Našaj Nivaj» źviazalisia svajaki akciora i pieradali apošniaje słova Siarhieja ŭ sudzie. Publikujem jaho całkam.
Akcior Siarhiej Vołkaŭ
«Ź vieraj, što chutka prahučyć i apraŭdalny prysud, dazvolu sabie vykazacca ad imia ŭsich pinčukoŭ, viaźniaŭ sumleńnia. Sud mocnaha nad słabym, pieramožcy nad pieramožanym, pa sutnaści, źjaŭlajecca trybunałam. Šyty biełymi nitkami fars. Novaja sacyjalnaja prafiłaktyka jak miera sacyjalnaj abarony hramadskaha ładu ad niepažadanych elemientaŭ. Pavodziny ŭpłyvajuć na maral. U taho, chto padmanuŭ, skraŭ, ździejśniŭ inšuju pravinnaść, što supiarečyć sumleńniu, i zastaŭsia biez pakarańnia, — nazaŭždy razmyvajecca ŭjaŭleńnie pra dabro i zło. Samavolstva viaredzić.
Biełaruskaja spraviadlivaść — heta, pieradusim, banalnaja pomsta z namieram zapałochać hramadzian, a ideałohija daje šukanaje apraŭdańnie lichadziejstvu. Zakony, ustalavanyja ludźmi, nie mohuć supiarečyć zakonam sumleńnia. Praŭda — adna, tym časam jak chłuśnia maje tysiačy masak. Adnak usim nam varta pamiatać słovy ź Jevanhiella: jakoj mieraj mierajecie, takaja i vam admieranaja budzie; i spahonicca z vas kožnaja kroŭ praviednaja, što vami pralivajecca; i ŭsie, chto ŭziaŭ mieč, ad jaho i zahinuć».
Nahadajem, što dziaržabvinavaŭca zaprasiŭ dla Siarhieja Vołkava čatyry hady źniavoleńnia. Usim astatnim fihurantam spravy pahražaje ad čatyroch da 5,5 hoda pazbaŭleńnia voli z adbyvańniem va ŭmovach ŭzmocnienaha režymu (2 častka artykuła 293 KK).
Pinskuju spravu razhladaje suddzia Viera Fiłonik.