Narviežskaja Yara pakul praciahnie pracavać z «Biełaruśkałijem»
Narviežskaja Yara ŭsio ž vyrašyła zastacca ŭ Biełarusi ŭ jakaści najbujniejšaha pakupnika «Biełaruśkałija». Pra heta ŭ intervju telekanału NRK zajaviŭ kiraŭnik kancerna Śviejn Ture Chołsieter.
12.08.2021 / 14:57
Rašeńnie, pa jaho słovach, było niaprostym.
«Ja b skazaŭ, što heta samaje składanaje, nad čym my pracujem. Prajšoŭ hod z taho času, jak situacyja abvastryłasia, ale my ŭžo šmat hadoŭ uśviedamlajem, što heta pryvabnaja kraina dla pakupak», — skazaŭ Chołsieter. Pry hetym jon adznačaje, što Yara — «pryvabny kłijent, i mahčyma my z časam atrymajem dobryja kantrakty i ŭ inšych miescach».
Kiraŭnik kampanii taksama padkreślivaje, što dla ich važna padtrymać rabočych «Biełaruśkałija».
«Z vieraśnia minułaha hoda ja dvojčy byŭ u Biełarusi razam z našym karparatyŭnym pradstaŭnikom. U suviazi z pajezdkami ŭ nas byli sustrečy sam-nasam z niezaležnym prafsajuznym rucham. Heta zrabiła hłybokaje ŭražańnie, kali jany hladziać nam u vočy i kažuć: «Yara, kali ty sydzieš, tady nam kaniec».
Pa słovach Chołsietera, Yara, siarod inšaha, pakłapaciłasia ab tym, kab rabočyja, jakich zvolnili z-za zabastoŭki suprać režymu, atrymali svaje pracoŭnyja miescy i kab rabotnikam byli vypłačanyja ich premii.
Akramia taho, z krasavika ŭ ich byŭ asobny supracoŭnik, jaki znachodzicca ŭ Salihorsku, kab raskazvać pra toje, što adbyvajecca na miescach.
«Kali my sydziem, to bolš nichto nie budzie zajmacca hetymi rečami», — reziumuje kiraŭnik Yara.
Zaŭtra, 13 žniŭnia, čakajecca sustreča Śviatłany Cichanoŭskaj z top-menedžarami Yara.
Nahadajem, ministr transpartu i kamunikacyj Litvy Maryus Skuodzis zajaviŭ, što sa śniežnia Litva admovicca ad tranzitu biełaruskaha kałiju. Na heta paŭpłyvali abvieščanyja ZŠA ŭ paniadziełak sankcyi, pad jakija trapiŭ u tym liku i «Biełaruśkalij».