Aryštavanych hamielčukoŭ pačali sudzić jašče ŭčora. Sud nad studentkaj praciahvaŭsia 3 chviliny
U Homieli 25 kastryčnika prajšła chvala zatrymańniaŭ, pad jakuju trapili amal 30 čałaviek. Viadoma, što na zatrymanych skłali pratakoły pa art. 19.11 KaAP (raspaŭsiudžvańnie infarmacyjnaj pradukcyi, jakaja źmiaščaje zakliki da ekstremisckaj dziejnaści abo prapahanduje takuju dziejnaść) nibyta za padpisku na «ekstremisckija» kanały. Pravaabaroncam stała viadoma, što sudzić zatrymanych pačali jašče ŭčora.
26.10.2021 / 19:39
Praz čatyry hadziny paśla zatrymańnia ŭ sudzie Navabielickaha rajona Homiela prajšoŭ sud nad 22-hadovaj studentkaj HDU Janinaj Źmitrovič. Dziaŭčyna — dačka śvietłahorskich aktyvistaŭ Viačasłava i Zoi Źmitrovičaŭ. Kala 11:30 25 kastryčnika Janinu zatrymali kala škoły, dzie jana pracuje. Janinu ŭ mašynie kala ŭvachoda čakali supracoŭniki HUBAZiKa i AMAPa. Jany padyšli da jaje i prapanavali prajechać ź imi, kab dać pakazańni ŭ jakaści śviedki. Ale dziaŭčyna paprasiła dasłać joj pozvu. Paśla hetaha dziaŭčynu schapili i zašturchali ŭ mašynu, adabrali telefon i zapatrabavali parol. Pad pahrozami hvałtu Janina była vymušana jaho dać. U vyniku, Źmitrovič advieźli ŭ aporny punkt Navabielickaha rajona.
U 14:07 baćkam pryjšło paviedamleńnie ź nieviadomaha numara: «Mianie zatrymali, sud praz hadzinu ŭ sudzie Navabielickaha rajona». Tolki ŭ sudzie baćkam udałosia pabačyć dačku. Tam jany daviedalisia, što zatrymali jaje za padpisku na «ekstremisckija» telehram-kanały. Na sudovaje pasiadžeńnie baćkoŭ nie puścili. Suddzia Alaksandr Zinčuk, pa słovach baćkoŭ, razhledzieŭ spravu Janiny za try chviliny. Zinčuk pryznaŭ studentku vinavataj i aryštavaŭ jaje na 15 sutak. Paśla suda Janinu adviali ŭ aporny punkt, a praź dźvie hadziny advieźli ŭ AUS Navabielickaha rajona. Svoj aryšt dziaŭčyna budzie adbyvać u homielskim IČU.