18 праваабарончых арганізацый патрабуюць неадкладна адмяніць прысуд Судаленку і Ласіцы
Сёння быў вынесены прысуд па крымінальнай справе ў дачыненні да дваіх праваабаронцаў мясцовага аддзялення «Вясна». Кіраўнік гомельскага аддзялення Леанід Судаленка быў асуджаны да трох гадоў калоніі, а валанцёрка Таццяна Ласіца — да двух з паловай.
03.11.2021 / 12:26
Леанід Судаленка і Таццяна Ласіца
18 праваабарончых арганізацый заклікаюць улады Беларусі неадкладна адмяніць гэты абуральны прысуд і зняць усе абвінавачванні як з Судаленкі і Ласіцы, гэтак і з яшчэ пяцярых праваабаронцаў «Вясны», якія ў гэты час знаходзяцца за кратамі паводле палітычна матываваных абвінавачванняў.
Судаленка і Ласіца ў судзе
«Палітычна матываваны крымінальны пераслед сябраў і валанцёраў «Вясны» ажыццяўляецца ў межах «зачысткі» грамадзянскай супольнасці. Няма сумневаў, што ўлады пераследуюць «Вясну» ў помсту за яе 25-гадовую бясстрашную працу па абароне правоў чалавека», — гаворыцца ў заяве.